काठमाडौं-२ मा चुनाव जितेर देखाउन गठबन्धनका उम्मेदवार घर्तीलाई स्वतन्त्रकी ढकालको चेतावनी !

१ कात्तिक, काठमाडौं । आगामी मंसिर ४ गते हुने प्रदेश र प्रतिनिधिसभा निर्वाचन अन्तर्गत काठमाडौं क्षेत्र न. २ को भिडन्त रोचक हुने देखिएको छ । यो क्षेत्रमा सत्ता गठबन्धन र अन्य दलका उम्मेदवारभन्दा स्वतन्त्र उम्मेदवारको चर्चा बढी हुन थालेको छ । गठबन्धनका तर्फबाट यो क्षेत्रमा पूर्वसभामुख एवं नेकपा माओवादीकी नेतृ ओनसरी घर्ती मैदानमा छन् ।

काठमाडौं क्षेत्र नं २ मा घर्तीसँगै एमालेबाट पार्टीको बागमती प्रदेश कमिटी सदस्य मणिराम फुयाल, राप्रपाबाट कुन्तीदेवी पोखरेल र स्वतन्त्रकी भगवती ढकालसहित २६ जना पुरुष र ५ जना महिला गरी ३१ जना उम्मेदवार मैदानमा छन् । पछिल्लो समय स्वतन्त्रबाट उम्मेदवारी दिएकी भगवती ढकालको चर्चा बढी सुनिन थालेको स्थानीयहरु बताउँछन् । ढकालले गठबन्धनका उम्मेदवार ओनसरी घर्तीलाई चुनाव जितर देखाउन चुनौतिसमेत दिएकी छन् ।

नेपालबहससँग कुरागर्दै स्वतन्त्र उम्मेदवार भगवती ढकालले भनिन, ‘काठमाडौं क्षेत्र न. २ को मत विभाजित छ । यो क्षेत्रमा माओवादी कम्जोर छ भने एमालेका उम्मेदवारले १२ हजार पनि कटाउन मुस्किल छ । गठबन्धनका उम्मेदवारलाई कांग्रेसको सबै मत जाँदैन । राप्रपाले ३ देखि ५ हजार मत कटाउँदा अन्य उम्मेदवारहरुले पनि काट्छन् । यसकारण यो क्षत्रमा गठबन्धन र एमालेका उम्मेदवारले जित्ने सम्भावना नै छैन् ।’

पूर्वसभामुख ओनसरी घर्तीका लागि प्रतिनिधिसभाको प्रत्यक्षतर्फ यो दोस्रो चुनाव हो । पहिलोपटक ०६४ सालमा समानुपातिकबाट संसद् प्रवेश गरेकी घर्ती ०७० सालमा रोल्पाबाट प्रत्यक्षतर्फ निर्वाचित भएकी थिइन् । त्यसपछि ०७४ सालको चुनावमा भने उनी पुनः समानुपातिकमै बसिन् । अहिले उनलाई कांग्रेससहितका दलहरुले सघाएका छन् । तर, स्वतन्त्रकी उम्मेदवार ढकालको विश्लेषण भने फरक छ ।

नेकपा एकीकृत समाजवादी पार्टीका अध्यक्ष एवं पूर्वप्रधानमन्त्री माधवकमार नेपालको परिवारसँग विगतमा नातासमेत रहेकी ढकाल पनि पूर्वमाओवादी नै हुन् । उनले यो क्षेत्रमा रहेको माओवादीको ७० प्रतिशत भोट आफुलाई आउने दावी गरेकी छन् । उनी यसअघि सभामुख अग्निप्रसाद सापकोटासंग राजनीति गरेको बताउँछिन् । यो क्षेत्रमा उनका जिल्लाबासीहरु धेरै भएकाले पनि चुनावमा गठबन्धनका उम्मेदवारलाई हराउने उनको दावी छ ।

स्वतन्त्र उम्मेदवार रहेकी ढकाल काठमाडौं क्षेत्र न. २ मा शहरी इलाका बाहेकको ७० प्रतिशत भोट आफ्नो भएको दावी नेपालबहससँग गरेकी छन् । उनले २० देखि २५ प्रतिशत एमालेको भोट आफुले पाउने दावी गर्दै नेकपा समाजवादी र नेपाली कांग्रेसबाट पनि घर्तीकै हाराहारीमा मत पाउने बताउँदै एमालेको उम्मेदवारसँग आफ्नो प्रतिस्पर्धा नै नहुने दावी गरिन् ।

उनले निर्वाचन आयोगबाट सूर्यमुखी फुल चुनाव चिह्न पाएकी छन् । यही चिह्न लिएर ढकाल अहिले मैदानमा उत्रिएकी छन् । पार्टी गत उम्मेदवारलाई जिताएर जनताले केही नपाएकाले आफुले स्वतन्त्रमा उम्मेदवारी दिएको बताउँदै आएकी अरुलाई पटक पटक सम्झीरहने जनाताले यो पटक आफुलाई सम्झने उनको भनाइ छ ।

सुर्यमुखी फुल बोकेर भोट मागिरहेकी ढकालले चुनाब जितेर आफुले पाउने सबै तलबभत्ता नलिने र आएको जति अनाथ बालबालीकालाई प्रदान गर्ने बताउँदै आएकी छन् । ढकालले ओनसरी घर्तीलाई महीला विरोधी भएको भन्दै आफुले भोट पाउनुपर्ने दावी गरिहेकी छन् । उनले घर्ती नै आफ्नो मुख्य प्रतिस्पर्धी हुने बताएकी छन् । सिन्धुपाल्चोक माइत भएका कारण पनि ढकालले काठमाडौं क्षेत्र न.–२ का जनताले आफुलाई मतदान गर्ने दावी गरेकी छन् ।

समानुपातिक र प्रत्यक्ष गरी तीनपटक संसद् छिरेकी घर्तीले यसपटक काठमाडौं–२ लाई चुनावी क्षेत्र त बनाइन् तर, जित निकाल्न भने सहज देखिदैन् । माओवादीको प्रभाव न्यून रहेको काठमाडौंलाई घर्तीको रोजाइमा परेपछि यसलाई थप चासोको साथ हेरिएको छ । जबकी यसअघिको प्रतिनिधिसभा निर्वाचनमा सिंगो काठमाडौं उपत्यकाबाट १० मध्ये माओवादीले एक सिटमात्र जित हात पारेको थियो ।

स्वतन्त्र उम्मेदवार ढकालकै भनाइ मानने हो भने पनि गत स्थानीय तहकै नतिजा हेर्दा पनि काठमाडौं क्षेत्र नम्बर २ मा माओवादी तेस्रो शक्तिको रुपमा देखिन्छ । यो क्षेत्रमा शंखरापुर नगरपालिका, कागेश्वरी मनोहरा नगरपालिका र काठमाडौं महानगरपालिकाका २ वटा वडा पर्छन् । गत वैशाखमा सम्पन्न भएको स्थानीय तहको वडागत मत परिणाम हेर्दा यो क्षेत्रमा नेकपा एमाले अगाडि देखिन्छ । २० हजार ६५५ मतसहित नेकपा एमाले पहिलो दल बनेको थियो भने सत्ता गठबन्धनमा रहेको दल नेपाली कांग्रेसले १७ हजार ३६९ मत पाएको थियो । त्यस्तै, माओवादीले ३ हजार १७४ मत ल्याई तेस्रो शक्तिमा खुम्चिनु परेको थियो ।

यसअघि माधवकुमार नेपाल निर्वाचित हुँदै आए पनि गत चुनावमा वडाध्यक्षको मत हेर्दा उनकै पार्टी एकीकृत समाजवादी पनि यो क्षेत्रमा शक्तिशाली देखिन्न । नेकपा एसले ७ हजार ९७८ मत ल्याएको थियो । यो मत पनि आधा आफुलाई आउने ढकालको दावी कायमै छ । यस्तै राष्ट्रिय प्रजातन्त्र पार्टी ‘राप्रपा’ले ७ हजार ३६० मत ल्याएको थियो भने अन्य दलको ४७६ मत थियो ।

दलहरुको छुट्टाछुट्टै मत हेर्दा एमाले अगाडि देखिए पनि समग्रमा जोड्दा भने गठबन्धन अगाडि देखिन्छ । सत्ता गठबन्धनमा रहेका दलहरुले वडाध्यक्षमा पाएको मत जोड्दा यो क्षेत्रमा २८ हजार ५२१ हुन आउँछ । यदि यही अनुपातमा मत खसे संसदीय चुनावमा सत्ता गठबन्धन एमालेभन्दा ७ हजार हाराहारी मतले अगाडि हुने देखिन्छ । तर, यो क्षेत्रमा माओवादीकोसमेत साथ पाएकी स्वतन्त्र उम्मेदवार ढकाल कम आक्न नमिल्ने स्थानीयहरु बताउँछन् ।