आगामी निर्वाचन जीवनमरणको सवाल होः प्रचण्ड

२ कात्तिक, काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आगामी ४ मंसिरमा हुने चुनाव जीवन मरणाको सवाल भएको बताएका छन्र । उनले चुनाव सामान्य भोट हाल्ने विषय मात्र नभएर प्राप्त उपलब्धिको रक्षा गर्ने र त्यसलाई उल्ट्याउन चाहने तत्वबीचको लडाइँ भएको बताएका छन् ।

प्रेस सेन्टर ललितपुरले प्रकाशन गरेको बेपत्ता पत्रकार मिलन नेपालीको सम्झनाको ‘मिलन स्मारिका’ विमोचनका क्रममा बुधबार बिहान उनले आगामी निर्वाचन आफूहरूका लागि मात्र नभएर नेपाली जनताकै जीवनमरणको सवाल भएको बताए ।

आगामी चुनाव दुई वटा प्रवृत्ति र विचारबीच लडाइँ हुने दिन भएको समेत बताए । ‘वास्तविक रुपमा आउँदो मंसिर ४ मा दुइटा विचार, दुईटा प्रवृत्ति, दुइटा धाराको बीचमा ब्याटल हुँदैछ। यो संविधान र परिवर्तनलाई उल्ट्याउन चाहने र यसलाई रक्षा गर्दै अझ अगाडि बढ्न चाहने दुइटा विचार, दुईटा प्रवृत्ति, दुइटा धारा र शक्ति आमनेसामने छन्’, प्रचण्डले भने ।

प्रचण्डले चुनाव जनक्रान्ति र जनयुद्धका उपलब्धि रक्षा गर्ने त्यो उल्ट्याउन खोज्नेबीचको लडाइँ जस्तो भएको उल्लेख गर्दै माओवादीसँग हिजो जस्तो फौज नभएकाले शान्तिपूर्ण प्रतिस्पर्धाबाटै आफ्नो श्रेष्ठता सावित गर्नुपर्ने चुनौती रहेको बताए ।

‘हामीसँग हिजोको जस्तो फौज त छैन । हामी शान्तिपूर्ण प्रतिस्पर्धामार्फत आफ्नो श्रेष्ठता सावित गर्ने चरणमा छौं’, अध्यक्ष प्रचण्डले भने, ‘समाजवादको उद्देश्य प्राप्तिका निम्ति नयाँ तरिकाको बाटो कोर्दैछौं ।’