वृद्धभत्ता बुझेर फर्कँदै गर्दा भिरबाट खसेर वृद्धको मृत्यु

३ कात्तिक, काठमाडौं । अर्घाखाँचीको भूमिकास्थान नगरपालिकामा भिरबाट लडेर एक वृद्धको मृत्यु भएको छ ।

भूमिकास्थान नगरपालिका–१ ढाकावाङका अन्दाजी ७२ वर्षीय वीरबहादुर गमालको भिरबाट लडेर मुत्यु भएको जिल्ला प्रहरी कार्यालयले जनाएको छ ।

उक्त नगरपालिकाको धारापानीस्थित साइन रेसुङ्गा बैंकबाट वृद्धभत्ता बुझेर घर फर्कँदै गर्दा ठूलाखोलास्थित घोप्टेसालको भिरबाट लडेर उनको मृत्यु भएको हो । गमाल बाटोबाट झण्डै ८० मिटर तल खसेको घटनास्थलमा पुगेको प्रहरी टोलिले जनाएको छ ।

घटनास्थलमा गएका प्रहरीको प्रारम्भिक अनुसान्धानअनुसार बुधबार दिउँसो करिब ४ बजेतिर गमाल र उनका दाजु भत्ता बुझेपछि हिँड्दै घर फर्कदैं थिए । साँझपख गमाल भिरबाट लडेको अवस्थामा स्थानीयवासीले देखेका थिए । घटनाबारे थप अनुसन्धान भइरहेको प्रहरीले जनाएको छ ।