मामा घर गएकी किशोरी भेरी नदीमा डुबेर मृत्यु

३ कार्तिक , रुकुम । सिस्ने गाउँपालिका वडा नम्बर ८ लम्पाकोट कि १४ बर्षिया अन्जली नाथको सानीभेरी नदीको किनारमा डुबेर मृत्यु भएको प्रहरीले जनाएको छ ।

सिस्ने ३ को मुलपानी भन्ने ठाउँमा बुधबार पौडी खेल्ने क्रममा डुबेर नाथको मृत्यु भएको जिल्ला प्रहरी कार्यालय रुकुम पूर्वले जानकारी दिएको छ ।खेतमा हजुर आमालाई खाजा लिएर मुलपानी गएको समयमा पौडी खेल्न गएको प्रहरीले जनाएको छ ।

लामो समयसम्म घर नआए पछि आफन्तले खोजी गर्दा सानीभेरी नदीको भँगालो छुटेर जम्मा भएको पानीमा मृत अवस्थामा फेला परेको जिल्ला प्रहरी कार्यालय रुकुम पूर्वका सूचना अधिकारी प्रहरी निरीक्षक कृष्ण खत्रीले जानकारी दिए ।

लक्ष्मी माध्यमिक विद्यालय कोहलपुरमा कक्षा ८ मा अध्ययनरत बालिका दशैं मान्न मामाको घर सिस्ने ३ गएकी थिइन ।