जीप दुर्घटनाका घाइते र मृतक परिवारलाई नगरपालिकाले आर्थिक सहयोग गर्ने

♦शिवजी मण्डेल

३ कात्तिक, बझाङ । बझाङमा जीप दुर्घटनामा परि ज्यान गुमाएका र घाइते भएकालाई जयपृथ्वी नगरपालिकाले आर्थिक सहयोग गर्ने भएको छ । नगरपालिकाले दुर्घटना भएको प्रति समवेदना पत्र जारी गर्दै बुधबार भएको जीप दुर्घटनामा मृतकको राहत र घाइतेहरुको उपचारको लागि तीन लाख रुपैयाँ उपलब्ध गराउने जनाएको हो ।

मृतकको राहत र घाइतेहरुको उपचारको लागि नगरपालिकाको तर्फबाट विपद कोषबाट खर्च गर्ने गरि तीन लाख सहयोग गर्ने घोषणा गरेको नगरप्रमुख चेतराज बजालले बताए ।

बुधबार दिउँसो जिल्लाको मष्टा गाउँपालिका–१ स्थित चिउरीमा डुङ्ग्रीबाट मष्टातर्फ गइरहेको सुपप्र ०१–००१ च ११७ नम्बरको जीप दुर्घटना भएको थियो। दुर्घटनामा ८ जनाको मृत्यु भएको छ भने १७ जना घाइते भएका छन्। यस्तै तलकोट गाउँपालिकाले यसअघि नै २ लाख उपलब्ध गराउने जनाएको छ ।