फ्रि भिसा र फ्रि टिकटबारे नेकपा एसका अध्यक्ष नेपालसँग आयोगले माग्यो स्पष्टीकरण, कारबाही गर्न प्रहरीलाई निर्देशन

३ कात्तिक, काठमाडौं । आगामी प्रदेश र प्रतिनिधिसभाको निर्वाचनमा भोट फकाउन मतदातालाई फ्रि भिसा र फ्रि टिकटको आश्वास दिएकोबारे निर्वाचन आयोगले नेकपा एकीकृत समाजवादीका अध्यक्ष माधवकुमार नेपालसँग स्पष्टीकरण मागेको छ ।

उनले आफ्नो निर्वाचन क्षेत्र रौतहटका मतदातालाई आफुलाई भोट दिएर जिताए वैदेशिक रोजगारीका लागि फ्रि भिसा र फ्रि टिकट मिलाइदिने आश्वासन दिएको समाचार बाहिरिएको थियो ।

यसै विषयमा आयोगले अध्यक्ष नेपाललाई २४ घण्टाभित्र चित्त बुझ्दो स्पष्टीकरण दिन भनेको छ । रौतहटमा चुनाव प्रचारका क्रममा ‘बिना ढेउवा के भिसा मिल्तै हैं, टिकट मिल्ते हे, काठमाडौंमै तालिम मिल्ते हेँ’ भनी सार्वजनिकरुपमा दिएको अभिव्यक्ति निर्वाचन आचारसंहिता विपरीत भएको भन्दै आयोले उनीसँग स्पष्टीकरण मागेको हो ।

आयोगले निर्वाचन आचारसंहिताको उल्लंघन हुन गएकोले नेपाललाई निर्वाचन आचारसंहिताको दफा २३ को उपदफा (३) तथा उपदफा (४) बमोजिमको कारवाही किन गर्नु नपर्ने भन्दै पत्र पठाएको छ । कुनै पनि माध्यामबाट पत्र पाएको २४ घण्टाभित्र निर्वाचन आयोग वा आफु उमेदवार रहेको जिल्लाको जिल्ला निर्वाचन कार्यालयमा आफैं उपस्थित भै वा आफ्नो प्रतिनिधिमार्फत् लिखित स्पष्टीकरण पेश भनिएको छ ।

यसैत्रीच निर्वाचन आयोगले रौटहट– १ का उम्मेदवार नेकपा एकीकृत समाजवादीका अध्यक्ष माधवकुमार नेपाललाई निर्वाचन प्रभाव पार्ने कसूर गरेको भन्दै कारबाही प्रक्रिया अघि बढाउन प्रहरीलाई आग्रह गरेको छ । आयोगले निर्वाचन कसुर तथा सजाय ऐन २०७३ को दफा ३९ अनुसार कारवाही प्रक्रिया अघि बढाउन जिल्ला प्रहरी कार्यालय रौतहटलाई निर्देशन दिएको हो ।

ऐनको दफा २० मा उम्मेदवारले मतदातालाई लोभलालच वा आर्थिक प्रलोभन देखाउन नहुने व्यवस्था उल्लेख छ । तर नेता नेपालले मतदातालाई फ्रि भिसा, फ्रि टिकटमा वैदेशिक रोजगारीमा पठाउने प्रलोभन देखाएको भन्दै आयोगले दफा ३९ अनुसार कारबाही प्रक्रिया अघि बढाउन प्रहरीलाई निर्देशन दिएको हो ।