३२ सय मत बोकेर डोटीमा घुमिरहेका आलेलाई कांग्रेसले साथ नदिने संकेत

३ कात्तिक, डडेलधुरा । आगामी प्रदेश र प्रतिनिधिसभाको निर्वाचनमा कांग्रेसले स्थान नपाएपछि डोटीको चुनावी माहोल खासै तात्न सकेको छैन् । कांग्रेस नेता बीरबहादुर बलायरको गृह जिल्ला भएपनि गठबन्धनको भागबण्डामा डोटी एकीकृत समाजवादीको भागमा परेपछि जित सुनिश्चित भएको जिल्ला छाडेर बलायर कैलाली ४ मा झेरपछि यहाँको चुनावी रौनक पनि उतै सरेको छ ।

गएको स्थानीय तह निर्वाचनमा डोटीमा नेपाली कांग्रेसका वडाध्यक्ष पदका उमेदवारले पाएको मत झन्डै ३४ हजार हाराहारीमा छ । अहिले प्रतिनिधिसभा सदस्यका लागि टिकट पाएको नेकपा एकीकृत समाजवादीको मत मुस्किलले पनि ३२ सय पुग्दैन । यही ३२ सय मत बोकेर अहिले नेकपा एसका उम्मेदवार प्रेमबहादुर आले डोटीमा घुमिरहेका छन् ।

कांग्रेसले नौमध्ये सात पालिका जितेको छ । एकीकृत समाजवादीले एउटा पालिका पनि जितेको छैन । त्यसैले सत्ता गठबन्धनमा सिट बाँडफाँट गर्दा डोटी कांग्रेसको भाग पर्ने धेरैको अनुमान थियो । डोटी कांग्रेस सुदूरपश्चिम प्रदेशका सभापति वीरबहादुर बलायरको गृहक्षेत्र भएकाले पनि अहिले डोटीमा कांग्रेस निकै बलियो छ ।

गठबन्धनमा सीट बाँडफाँट हुँदा यौ जिल्ला नेकपा एकीकृत समाजवादीको भाग पर्यो र गठबन्धनको यो निर्णयले डोटीका कांग्रेस कार्यकर्ताहरु खिन्न भए । स्थानीय निर्वाचनमा कांग्रेसभन्दा ३० हजार कम मत पाएको नेकपा एसले प्रेम आलोलाई उम्मेदवार बनाएर पठाएपछि डटीका कांग्रेस कार्यकताहरु अलमलमा परेका छन् ।

बलायरले मैदान छाडे पनि डोटीमा आलेको विजय सहज देखिँदैन । कारण, सत्ता गठबन्धनको प्रमुख दल कांग्रेसको सहयोग आलेलाई जाने देखिएको छैन । अहिले डोटी कांग्रेसका नेताहरू आलेको पक्षमा भोट मागिरहेका छैनन् । उनीहरुले अन्त्यमा कसलाई सहयोग गर्ने हुन भन्ने पनि एकिन भएको छैन् । कांग्रेसबाट लौरो उठाएपनि जित्ने अवस्थामा समेत कांग्रेस कार्यकताहरुले रुखमा भोट हाल्न नपाएपछि परिस्थिति असहज बन्दै गएको छ ।

कांग्रेसका नेताहरु भन्छन्, गठबन्धनका नाममा जिल्लामा तीन हजार भोट नभएको पार्टीलाई डोटी जिल्ला जिम्मा लगाइएको छ । यसले कांग्रेसमा असन्तुष्टि बढेको छ । एकीकृत समाजवादीका नेता पनि आलेको जितप्रति ढुक्क छैनन् । कारण हो कांग्रेसको भोटमा अहिलेसम्म भर गर्न सक्ने अवस्था सिर्जना भएको छैन् ।

०६४ सालमा भएको पहिलो संविधानसभा निर्वाचनमा पराजित आले ०७० मा विजयी भएका थिए । ०७४ को प्रतिनिधिसभा सदस्य निर्वाचनमा आलेले बलायरलाई हराएका हुन् । त्यति बेला बाम गठबन्धन रहेको थियो । अहिले आलेलाई जितबाट रोक्नका लागि नेकपा एमालेका पोलिटब्युरो सदस्य तथा संविधानसभा सदस्य गौरी वली र स्वतन्त्र उमेदवार नरेन्द्रबहादुर खड्का कस्किएका छन् । स्वतन्त्र उमेदवारले मत काटेमा आफू विजयी हुने वलीको विश्वास छ ।

डोटीमा खड्काको स्वतन्त्र उमेदवारीलाई चासोपूर्वक हेरिएको छ । उनले दिपायल प्रदेशको राजधानी हुनुपर्ने भन्दै तत्कालीन आन्दोलनको नेतृत्व गरेका थिए । खड्का आफ्नो उमेदवारी र राजधानीको एजेन्डा समग्र डोटेली जनताको भएकाले विजयी हुने जिकिर गर्छन् । उनले असन्तुष्ट कांग्रेसको मत पनि पाउने आसा राखेका छन् ।

डोटी उद्योग वाणिज्य संघको नेतृत्व गरिसकेका खड्का आफ्नो पक्षमा डोटीका व्यापारी, राजधानीको आन्दोलनमा लागेका स्थानीय र सिट बाँडफाँटबाट असन्तुट कांग्रेस कार्यकर्ता उभिएको दाबी गर्छन् । आफ्नो प्रमुख मुद्दा नै डोटी र डोटेलीको अस्तित्वसँग जोडिएको उनी बताउँछन् । उनले कांग्रेसको क्रियाशील सदस्यता त्यागेर स्वतन्त्र उमेदवारी दिएका कारण पनि कांग्रेसको अधिक मत उनलाई जाने सम्भावना पनि कायमै छ ।