बझाङ उद्योग वाणिज्य संघ कप २०७९ काे उपाधि पुरुषतर्फ केदार स्युँलाई र महिलातर्फ छबिसपाथीभेरालाई

♦ शिवजी मण्डेल

५ कात्तिक, बझाङ । “बझाङ उद्योग वाणिज्य संघ कप २०७९” को उपाधि पुरुषतर्फ केदारस्युँ गाउँपालिका र महिलातर्फ छबिस पाथीभेरा गाउँपालिकाले हात पार्न सफल भएका छन् ।  बझाङ उद्योग बाणिज्य संघले सिलदेवी मेलाको अवसर पारेर गत असोज ३० गतेदेखि सुरु गरेकाे सर्वाधिक ठूलो धनराशीको जिल्ला स्तरीय ‘उद्योग वाणिज्य संघ कप २०७९’ शनिबार सम्पन्न भएको हाे ।

आज शनिवार सदरमुकाम चैनपुरमा भएको पुरुषतर्फको फाइनल खेल केदारस्युँ गाउँपालिका र छबिसपाथीभेरा गाउँपालिका बीच प्रतिस्पर्धा भएको थियो । जसमा छबिसपाथिभेरा गाउँपालिकालाई हराउँदै केदारस्युँ गाउँपालिका प्रथम भएको छ । केदारस्युँ गाउँपालिकासँग हार बेहोरेको छबिसपाथीभेरा गाउँपालिका द्वीतिय भएको छ , भने यसअघि नै मष्टा गाउँपालिका तृतीय र बुङ्गल नगरपालिकाले सान्त्वना पुरस्कार पाइसकेको सञ्चारकर्मी समीर कठायतले बताए ।

प्रतियोगिताको प्रथम केदारस्युँ गाउँपालिकाले रु १ लाख ३१ हजार १ रुपैयाँ ११ रुपैयाँ नगदसहित कप मेडल सँगै प्रमाणपत्र, द्वितीय छबिसपाथिभेरा गाउँपालिकाले रु ७५ हजार १ सय ११ रुपैयाँ नगदसहित कप मेडलका साथै प्रमाणपत्र, तथा तृतीय भएको मष्टा गाउँपालिकाले रु ५१ हजार १ सय ११ रुपैयाँ नगदसहित कप मेडल सँगै प्रमाणपत्र,र सान्त्वना भएको बुङ्गल नगरपालिकाले रु ११ हजार १ सय ११ रुपैयाँ नगदसहित कप मेडल सँगै प्रमाणपत्र पाउनेछन् । प्रतियोगितामा १६ टीमको सहभागिता भएको थियो ।

त्यस्तै शुक्रबार सम्पन्न भएको महिलातर्फको भलिबल प्रतियोगिताको विजेता छबिसपाथीभेरा गाउँपालिका भएको छ। शुक्रबार महिलातर्फ फाइनल खेल छबिसपाथीभेरा गाउँपालिका र मष्टा गाउँपालिका बीच प्रतिस्पर्धा भएको थियो । जसमा मष्टा गाउँपालिकालाई हराउँदै छबिसपाथिभेरा गाउँपालिकाले कप हात पारेको हो । छबिसपाथिभेरा सँग हार बेहोर्दै मष्टा गाउँपालिका द्वितिय भएको छ । त्यस्तै जयपृथ्वी नगरपालिका तृतीय र बित्थडचिर गाउँपालिकाले सान्त्वना पुरस्कार प्राप्त गरेकाे छ ।

उद्योग वाणिज्य संघ कप २०७९ मा सहभागी टीमलाई पन्छ्याउँदै प्रथम भएको छबिसपाथिभेरा गाउँपालिकाले रु ५१ हजार १ सय ११ रुपैयाँ नगदसहित कप, मेडलको साथै प्रमाणपत्र, द्वितीय मष्टा गाउँपालिकाले रु ३१ हजार १ सय ११ रुपैयाँ नगदका साथै कप मेडल र प्रमाणपत्र, तथा तृतीय जपयृथ्वी नगरपालिकाले रु २१ हजार १ सय ११ रुपैयाँ नगद र कप मेडलका साथै प्रमाणपत्र हात पारेको छ, भने त्यस्तै सान्त्वना भएको बित्थडचिर गाउँपालिमाले रु ५ हजार १ सय ११ रुपैयाँ नगदसहित कप मेडल सँगै प्रमाणपत्र जितेको छ ।

महिलातर्फ प्रतियोगितामा ९ टीम सहभागी भएका थिए । छबिसपाथिभेरा गाउँपालिकाको महिला टीमले यसअघि पनि थलारा गाउँपालिकाले दशैं तिहारको अवसर पारी आयोजना गरेको भलिबल प्रतियोगितामा प्रथम भएको थियो । प्रतियोगिता सुरु भएको समय भलिबल खेल मात्रै नभएर अन्य साँस्कृतिक कार्यक्रम र देउडा प्रतियोगिता पनि भएको थियो ।