माछापुच्छ्रे बैंकको मुनाफा संकुचित

७ कात्तिक, काठमाडौं । माछापुच्छ्रे बैंकले चालु आर्थिक वर्षको पहिलो त्रैमाससम्मको वित्तीय विवरण सार्वजनिक गरेको छ । प्रकाशित विवरणअनुसार बैंकको खुद मुनाफा १९.६५ प्रतिशतले घटेर ४५ करोड ११ लाख रुपैयाँमा झरेको छ ।

गत वर्षको यसैअवधिमा यसले ५६ करोड १५ लाख रुपैयाँ खुद मुनाफा कमाएको थियो । बैंकको वितरणयोग्य मुनाफा भने ५.८८ प्रतिशतले बढेर १ अर्ब ५४ करोड रुपैयाँ भएको छ । गत वर्ष यसको वितरणयोग्य मुनाफा १ अर्ब ४५ करोड रुपैयाँ रहेको थियो ।

असोज मसान्तसम्म आइपुग्दा खुद ब्याज आम्दानी १५.८९ प्रतिशत ले बढेको छ भने सञ्चालन नाफामा २०.०१ प्रतिशतले ह्रास आएको छ । बैंकको प्रतिसेयर आम्दानी ४ रुपैयाँ ३१ पैसाले घटेर १७ रुपैयाँ ५९ पैसामा झरेको छ । गत वर्ष यसको प्रतिशेयर आम्दानी २१ रुपैयाँ ९ पैसा रहेको थियो । यसको प्रतिसेयर नेटवर्थ १४९ रुपैयाँ ९ पैसा रहेको थियो ।