राजु थापाकाे मत माग्ने फरक शैली: धान काट्न सघाउँदै, मत माग्दै

८ कात्तिक, स्याङ्जा । प्रतिनिधिसभा र प्रदेशसभा निर्वाचन आउन २९ दिन मात्र बाँकी छ। स्याङ्जाका २ संघीय र ४ प्रदेशसभा निर्वाचनमा यहाँ १३ राजनीतिक दल र स्वतन्त्र गरी ५२ जना चुनावी प्रतिस्पर्धामा छन्। उनीहरुलाई मत माग्नै चटारो छ।

त्यसो त, कात्तिककाे दिन। हिले दशैं सकिएर घाम राम्रोसँग लागेको छ । खेतमा धान पाकेर पहेंलपुर बनेका छन् । प्रायः किसानका घरमा ढोका लागेका छन् । उनीहरु धान काट्ने र कुन्यु लगाउने चटारोमा छन् । मानो खाएर मुरी थन्क्याउने बेला हाे याे । यतिबेला मौसमले पनि साथ दिएको छ। टहटह घाम लागेको छ। प्रायजसोः सबैजना दिनभर खेतमै भेटिन्छन् । बालबालिका र बृद्ध बाहेक बिहानदेखि साँझसम्म उनीहरु खेतमा हुन्छन् यतिबेला । यसैको सदुपयोग गर्दै स्याङ्जाका प्रतिनिधिसभा क्षेत्र नं. १ का उम्मेदवार राजु थापा खेत खेतमै पुगेर मत मागिरहेका छन्।

‘पहिला घरमै पुग्छौं, जेष्ठ नागरिकका आर्शिवाद लिन्छौं, त्यसपछि खेतमा पुगेर मत माग्ने गरेका छौं।’ उनले भने । उनी नेपाली कांग्रेसतर्फका उम्मेदवार हुन। राजु थापासँगै प्रदेश १ का उम्मेदवार अमृता थापा पनि सँगै छन्। जिल्लामा गठबन्धन हुदाँ यो क्षेत्र नेकपा माओवादी केन्द्रलाई परेको छ। उनको जन्मथलो पनि सोही भेगमा पर्छ। हरिनाश गाउँपालिकामा पुगेर उनीहरुले मत मात्र मागेनन् की धान काट्दै गरेका किसानसँगै धान काटे भने धान बत्ताउँदै गरेका किसानसँग धान पनि बत्ताउँदै मत मागे। उनले खेतमा हलाे जाेतेर राेपाई पनि गर्न भ्याए ।

उम्मेदवारको यो भोट माग्ने फरकशैली देखेर किसानहरु पनि खुशी र दंग थिए। उनीहरु भन्दै थिए, ‘खेतबारीसम्म आएर मत मागेपछि हाम्रा अवस्था बारेमा पनि चिन्तन होलानी ?’ हुन त, विस २०७४ सालको प्रतिनिधिसभा सदस्यमा पराजित बनेका थापा पटकपटक सो गाउँमा पुगेका छन्। गाउँका अवस्था बारे उनी साक्षात्कार छन्।