साझा उम्मेदवारको समीक्षा र बागीका विषयमा छलफल गर्न सत्ता गठबन्धनको बैठक बालुवाटारमा

९ कात्तिक, काठमाडौं । आगामी मंसिर ४ को प्रतिनिधिसभा र प्रदेशसभा निर्वाचनमा आफ्ना तर्फका उम्मेदवारहरुको अवस्था र पाँच दलका कार्यकर्ताहरुको इतर पक्षको चुनाव चिह्नमा मतदान गर्न देखिएकोकठिनाइबारे छलफल गर्न सत्ता गठबन्धनकोे बैठक आज बस्दै छ ।

प्रधानमन्त्रीको सरकारी निवास बालुवाटारमा शीर्ष नेताहरुको बैठक बस्ने तयारी भइरहेको प्रधानमन्त्री शेरबहादुर देउवाको निजि सचिवालयले जनाएको छ । बैठकमा सत्ता गठबन्धनमा आवद्ध दलका बागी उम्म्ेदवारमाथि गरिने कारबाहीबारे पनि छलफल हुने छ ।

सत्ता गठबन्धनमा रहेका दलले आगामी मंसिर ४ मा हुन लागेको आम निर्वाचनमा पार्टीका बागी उमेदवारलाई कारबाही गर्ने तयारी गरेका छन् । आजको बैठकमा चुनावी सभाबारे पनि छलफल हुने बताइएको छ । निर्वाचन नजिकिँदै गएकाले बागीलाई समय दिनुभन्दा कारबाही नै गर्नुपर्ने अवस्था आएको गठबन्धनका नेताहरुको बुझाइ रहेको बताइएको छ ।

तर, केही स्थानमा सत्ता गठबन्धनभित्रै मित्रवत् प्रतिस्पर्धा गर्ने गठबन्धनमै सहमति भएकाले त्यहाँका उमेदवारलाई भने कारबाही हुने छैन । गठबन्धनमा नेपाली कांग्रेसका बढी बागी उमेदवार छन् । काठमाडौं क्षेत्र न. १० र ३ का विषयमा पनि बैठकमा छलफल हुनेछ ।