संविधानको रक्षा र आर्थिक विकासको मुल लक्ष्य बोकेको आम निर्वाचन निष्पक्ष र शान्तिपूर्ण हुन्छ:  प्रधानमन्त्री

९ कात्तिक, काठमाडौं । प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले मंसिर ४ को प्रदेश र प्रतिनिधिसभाको निर्वाचनको मुल उदेश्य संविधानको रक्षा र आर्थिक विकास भएको बताएका छन् । उनले मंसिर ४ गते हुने निर्वाचनलाई सरकारले निष्पक्ष र शान्तिपूर्ण रुपमा सम्पन्न गराउने पनि बताएका छन् ।

नेपाल संवत् ११४३ को अवसरमा भक्तपुर ठिमीमा बुधबार आयोजित नेपाल सवंतका प्रवर्तक राष्ट्रिय विभूति शंखधर शाख्वाको माल्यार्पण समारोहमा उनले निर्वाचन सफल बनाउन राजनीतिक दल, नागरिक समाज, बुद्धिजीवी वर्ग र सम्पूर्ण नागरिकले आफ्नो क्षेत्रबाट सहयोग गर्न पनि आग्रह गरेका छन् । उनले सरकारले नेतृत्व मात्रै गर्ने भएकाले निर्वाचनलाई शान्तीपूण,भयरहित र निष्पक्ष बनाउन आम नागरिकको ठूलो भूमिका हुने बताए ।

प्रधानमन्त्री देउवाले आम निर्वाचन मुलुकको संविधानको रक्षा, आर्थिक सुदृढिकरणका लागि महत्वपूर्ण हुने बताए । निर्वाचनमा सबै सक्रियताका साथ लाग्न उनले आग्रह गर्दै तत्कालिन प्रधानमन्त्री केपी ओलीका कारण देशमा राजनीतिक अस्थिरता आएको र त्यो अस्थिरताबाट देशलाई जोगाउन गठबन्धन बनाउनु परेको बताए ।

देउवाले नेपालको सामाजिक इतिहासलाई उचो राख्ने शंखधर शाख्वाजस्ता महान व्यक्तिबाट हामीले सिक्न जरुरी भएको बताए । उनले दलभन्दा माथि उठेर राष्ट्रिय हितलाई प्राथमिकतामा राखेर अगाडि बढ्नुपर्ने आवश्यकता रहेको धारणा राखे । उनले नेपाल संवत् नेपालीको मौलिक संवत् भएको बताए ।

निर्वाचनमा सबैले सहज रुपमा मतदान गर्न पाउने भन्दै देउवाले आगामी निर्वाचनलाई ठूलो पर्वका रुपमा लिएर चुनावी अभियानमा सहभागि हुने सबैमा आग्रह गरे । उनले लोकतन्त्रबादीहरुका लागि निर्वाचन महाउत्सव भएको बताए ।