भँगाहाकाे पररिया घटनामा ८ बुँदे सहमति, छानबिन गर्न उच्चस्तरीय टोली गठन गरिने

११ कात्तिक, जनकपुरधाम । महोत्तरीको भँगाहा नगरपालिका-८ पररियामा बिहीबार भएको झडपका विषयमा स्थानीय दुई समुदायबीच ८ बुँदे सहमति भएको छ ।

पररियामा हिन्दु बाहिनी सेना सम्राटबाट छठ पर्वको अवसरमा निकालिएको कलश तथा झण्डा यात्राको क्रममा हिन्दु र मुस्लिम समुदायका पक्षबीच झडप भएपछि उग्र रुप लिएको थियो । झडपमा १५ जना भन्दा धेरै घाइते भएका थिए । घटनालाई मत्थर तुल्याउन भन्दै स्थानीय प्रशासनले बिहीबार ४ बजेदेखि अनश्चितकालका लागि कर्फ्यु आदेश जारी गरेको थियो ।

शुक्रबार बिहान जिल्ला प्रशासन कार्यालयमा भएको छलफलपछि ८ बुँदे सहमति भएको हो । जसमा असमझदारी र झडपको स्थितिलाई नियन्त्रण गरी सामाजिक सद्भाव कायम गर्न घटनामा संवद्ध दुवै पक्षलाई र आम नागरिकलाई आह्वान गर्ने र धनजनको क्षति विवरण संकलन गर्ने सहमति भएको छ ।

यस्तै, धनजनको क्षतिको विवरणलाई क्षतिपूर्तिको लागि सिफारिस गर्न टोली गठन गर्ने, घाइतेको उपचारका लागि आवश्यक व्यवस्था मिलाउन र छानबिनका लागि उच्चस्तरीय टोली गठन गर्न गृह मन्त्रालयलाई अनुरोध गर्ने, घटनामा संलग्न दोषी पत्ता लगाई कारबाही प्रक्रिया अघि बढाउने सहमति भएको छ ।

पररिया क्षेत्रमा सामाजिक सद्भाव कायम गर्न सद्भाव र्‍याली निकाल्ने, दलगत रुपमा शान्ति कायम गर्न अपिल गर्ने तथा आगामी निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गर्न राजनीतिक दल, सरोकारवाल पक्षहरुले सहयोग गर्ने लगायत विषयमा सहमति भएको छ ।