सुदूरगार्मेन्ट, सस्तो तथा सुलभ मूल्यमा फेन्सी

♦ राजकुमार साउद

११ कात्तिक, सहजपुर । ‘सुदूरगार्मेन्ट’ कैलालीको गोदावरी नगरपालिकामा मात्र नभई आसपासका अन्य पालिकामा पनि चर्चित नाम हो । गोदावरी नगरपालिका–६ लालपुरमा रहेको उक्त गार्मेन्टले सस्तो तथा सुलभ मूल्यमा फेन्सीका सबै सामान प्रदान गर्न थालेपछि सबैको प्रिय बनेको छ । उक्त गार्मेन्टका सञ्चालक हुन्, सोही वडामा बस्ने रमेश महता ।

विसं २०७३ मा छरछिमेकसँग सापटी लिएर कैलालीकै गोदावरी नगरपालिका–६ लालपुरमा उक्त गार्मेन्ट सञ्चालनमा ल्याएका उनले गार्मेन्टसम्बन्धी आफ्नो लामो अनुभव र श्रीमतीले पनि सिलाइसम्बन्धी काम गरेकीले व्यवसाय सञ्चालनमा सहजता आएको बताए । “सुरुआती चरणमा गार्मेन्ट अगाडि बढाउन केही समस्या थियो तर मैले लामो समयसम्म गार्मेन्टमा काम गरेको र श्रीमतीले पनि सिलाइकटाइसम्बन्धी सीप सिकेको हुँदा सोचे जति अप्ठ्यारो भएन”, महताले भने, “थोरै लगानीबाट सुरु गरेको गार्मेन्टले राम्रो प्रगति गर्दै उद्योगको रुप लिएको छ ।”

छ वर्षअगाडि रु पाँच लाखको लगानीमा स्थापना गरिएको उद्योगको लगानी अहिले बढेर रु तीन करोड भन्दाबढी पुगेको छ । सुरुमा गार्मेन्टमा उत्पादन गरिएका लुगा कपडा गार्मेन्टकै अगाडि खोलेको पसलबाटै बिक्री वितरण गर्दै आएका उनले अहिले छिमेकी बजारका साथै सुदूरपश्चिम प्रदेशका विभिन्न जिल्लामा कपडा पठाउँदै आएका छन् । लत्ताकपडा ढुवानीका लागि अहिले उनले गाडीसमेत खरिद गरिएको छ ।

गार्मेन्टमा उत्पादन गरिएका कपडा मोटरसाइकलबाट ढुवानी गर्न समस्या भएपछि आफूले गाडी खरिद गरेको महताले बताए । विद्यालयका ट्र्याक सुट, जर्सी, ज्याकेट, टिसर्टलगायत अर्डरअनुसारको सबै प्रकारको कपडासमेत गारमेन्टमा उत्पादन हुन्छ । झण्डै १० वर्ष भारत, दुई वर्ष विदेश र एक वर्ष काठमाडौंमा गार्मेन्टकै क्षेत्रमा काम गरेका उनी नोकरीको सिलसिलामा विभिन्न ठाउँमा सँगालेका अनुभवलाई आफ्नै क्षेत्रमा प्रयोग गरेर मालिक बन्न सफल भएका हुन् ।

घरपरिवारभन्दा बाहिर बसेर मासिक रु ४० हजार जति कमाउँदै आएका महताले अहिले सबै खर्च कटाएर वार्षिक रु १०÷१२ लाख आम्दानी गर्दै आएको जानकारी दिए । उनले सञ्चालनमा ल्याएको गार्मेन्टमा अहिले स्थानीय १५ जनाले रोजगारीसमेत पाएका छन् । “गारमेन्टमा मैले १५ जनालाई रोजगारी दिएको छु”, महताले भने, “काम गर्ने कामदारहरुलाई सुरुआतमा करिब एक महिनासम्म तालिम दिएर काममा राख्ने गरेको छु, जसले गर्दा उनीहरुको पनि सीप अभिवृद्धि भइरहेको छ ।”

गार्मेन्टमा आवश्यक पर्ने कच्चापदार्थ काठमाडौं र भारतबाट ल्याउने गरेको र बाहिरबाट आएको कपडाभन्दा गार्मेन्टमा तयार पारिएको कपडा सस्तो हुने उनले बताए । गार्मेन्टबाटै महताले एउटा गाडी किन्नाका साथै सोही ठाउँमा जग्गा किनेर घर बनाउनाका साथै सोही घरमा गार्मेन्ट राखेका छन् ।

उनको गार्मेन्टमा हाल १२ वटा मेसिन रहेकामा समय अनुकूल भए लगानी बढाएर ३० देखि ३५ वटासम्म मेसिन सञ्चालनमा ल्याउने योजना बनाएको उनले बताए । स्थानीयस्तरमा हुने खेलकुदका कार्यक्रममा उल्लेखनीय योगदान दिँदै आएका महताले समाजमा हुने अन्य विकास र निर्माणका कार्यका साथै अनाथ एवम् असहायहरुलाई पनि सहयोग गर्दै आएका छन् ।

समस्याले नै बनायो गार्मेन्ट मालिक

डडेल्धुराको भागेश्वर गाउँपालिका–५, बगरकोट सिराडबाट कैलालीको गोदावरी नगरपालिका–६, भुएरामा बस्दै आएका उनको बाल्यकाल सुखद रुपमा नै बित्यो । विसं२०४३ फागुन ७ मा जन्मनु भएका महता उतिबेला कक्षा १० मा पढ्दा पढदै तत्कालीन नेकपा माओवादीको जनआन्दोलनको डरले पढाइ छाडेर साथीसँग भारतको दिल्ली पुगे । भारत पुगेपछि खानकै लागि पहिले चिया बनाएर बेच्न थाल्नुभयो । केही महिनापछि दिल्लीमै हार्नेस बनाउने कम्पनीमा काम गर्न थाले तर यो कामबाट पनि चित्त नबुझेपछि उनी एक महिनासम्म गार्मेन्टको सीप सिकेर सोही कम्पनीमा जागिर पाए ।

भारतका विभिन्न गार्मेन्ट कम्पनीमा काम गरेका महताले झन्डै १० वर्ष भारतका विभिन्न गार्मेन्ट उद्योगमा काम गरेरेर उतिबेलै करिब ३५ देखि ४० हजारसम्म भारतीय रुपैयाँ कमाउने गरेको सुनाए । माओवादीको डर सकिएपछि भारतमा सिकेको सीप लिएर उनी नेपाल फर्किए ।

नेपालमा आएपछि कञ्चनपुरकी मीना महतासँग विवाह गरेका उनले परिवार पाल्नुकै लागि काठमाडाैं आएर करिब एकवर्ष जति गार्मेन्टकै काम गरेपछि त्यहीँबाट मलेसिया पुगेर गार्मेन्ट कम्पनीमै करिब दुई वर्ष काम गर्नुभयो । त्यहाँबाट फर्केपछि उनले आफ्नै गार्मेन्ट खोलेर बस्ने योजनाअनुसार नै सुदूर गार्मेन्टको सुरुआत भएको थियो । रासस