दक्षिण कोरियामा आइतबार राष्ट्रिय शोक

१३ कात्तिक, सिउल । दक्षिण कोरियाका राष्ट्रपति युन सुक–योलले सियोलमा ह्यालोविन उत्सवमा १५१ जनाको मृत्यु भएपछि आइतबार राष्ट्रिय शोकको घोषणा गरेका छन् ।

राष्ट्रपति युनले पीडितहरुप्रति समवेदना व्यक्त गर्दै घाइतेहरुको शीघ्र स्वास्थ्यलाभको कामना गरेका छन् ।

‘यो वास्तवमै दुखद् हो’ उनले एक विज्ञप्तिमा भने ‘एक त्रासदी घटना राजधानी सिउलको मुटुमा भएको छ ।’ सयोलमा शनिबार राति ह्यालोविन कार्यक्रममा भएको भागदौडमा १ सय ५१ जनाको मृत्यु हुनुका साथै ८२ जना घाइते भएका थिए । साँघुरो स्थानमा कार्यक्रममा ठूलो क्षति भएको सुरक्षा अधिकारीहरूको निष्कर्ष छ ।

उक्त घटनाप्रति विश्व नेताहरूले शोक प्रकट गरेका छन् । प्रधानमन्त्री शेरबहादुर देउवाले आइतबार नै घटनाप्रति दुःख व्यक्त गरेका छन् ।