चुरा गोदामका आगलागी : एककाे मृत्यु, एकको अवस्था गम्भिर

♦ दीपक शर्मा

१३ कात्तिक, बाँके । बाँके चुराको गोदाम भएको स्थानमा आगलागी हुँदा एक जनाको मृत्यु भएको छ भने अन्य एक जना घाइते भएका छन ।आइतबार बिहान ५ बजेर ३० मिनेटको समयमा नेपालगञ्ज उपमहानगर पालिका ५ रामनगरमा राजनकुमार नागको घरमा रहेको मोहम्मद आरिफ अन्सारीको चुराको गोदाममा आगलागी हुदा उनका साला नाता पर्ने बर्दिया मधुवन नगरपालिका ८ निवासी २३ वर्षिय समिर ओलीको मृत्यु भएको जिल्ला प्रहरी कार्यालय बाँकेका प्रहरी उपरिक्षक श्यामकृष्ण अधिकारीले जानकारी दिए ।

आगलागीबाट अन्दाजी ४० देखि ४२ लाखसम्मको क्षति भएको नेपालबहससँगको कुराकानीमा अधिकारीले बताए । घर भाडामा लिएर चुरा व्यवसाय गर्दै आएका मोहम्मद आरिफ अन्सारी गम्भिर घाइते भएका छन । उनको भेरी अञ्चल अस्पतालमा उपचार भैरहेको छ ।

आगलागीको कारण प्रहरीले खोजी गरिरहेको छ । मृतक ओली शनिवार मात्रै आफनो दिदी भिनाजुलाई भेटन नेपालगञ्ज गएका थिए । ओली घर भित्र सुतेको र उनका भिनाजु घर बाहिर सुतेको बेला गोदाममा एक्कासी आगलागी भएको थियो । आगो नेपाल प्रहरी, शसस्त्र प्रहरी र दमकलको सहायताले करिब ३० मिनेट पछि नियन्त्रणमा लिइएको थियो ।