माओवादी केन्द्रको घोषणापत्र कार्यान्वयन गर्ने ठाउँमा पुग्छाैं : प्रचण्ड

१४ कात्तिक, काठमाडाैं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले चुनावी घोषणापत्र कार्यान्वयन नहुने कुनै गुन्जायस नभएको बताएका छन् ।

सोमबार पार्टीको केन्द्रीय कार्यालय पेरिसडाँडामा पार्टीको चुनावी घोषणापत्र सार्वजनिकपछि संचारकर्मीहरुसँगको कुराकानीमा उनले घोषणापत्र कार्यान्वयन हुने ठाउँमा आफू पुग्ने समेत दाबी गरे । कार्यक्रममा उनले यसपटक आफैं प्रतिवद्धता पूरा गर्ने र कार्यान्वयन गर्ने ठाउँमा पुग्छौं भन्दै सरकारको नेतृत्वको संकेत दिए ।

‘हामीले प्रतिवद्धता पत्र भनेर ०७४ सालमा पनि सार्वजनिक गरेका थियौं । बरु सरकार एकाधिकार ढंगले चलाइयो । हामीलाई आइस्युलेट गरियो । हामीले पहिले गरेका प्रतिवद्धता पूरा गर्न अहिले हामीलाई मत दिनोस् भनेका छौं’ उनले भने ।

अध्यक्ष प्रचण्डले आफू सुरक्षित हुन्छु भनेर गोरखा २ मा नगएको दाबी समेत गरे । ‘म सुरक्षित हुन्छु भनेर गोरखा गएको होइन । यहाँ मैले धेरै समय पढाएको छु । गठबन्धन दलका शीर्ष नेताहरूसँग सल्लाह गरेरै म रोल्पा र काठमाडौंबाट समेत निर्वाचन लडेको हुँ,’ उनले भने, ‘म सिरहामा पनि गएर चुनाव लडें । चितवन आफ्नै जिल्ला भएकाले एकपटक चुनाव लडौं भनेर गएको हुँ ।’

शासकीय प्रणालीका विषयमा गठबन्धनका दलसँग छलफल गरेर कार्यान्वयन गर्ने उनले बताए । आफ्नो पार्टीले उठाउँदै आएको प्रत्यक्ष निर्वाचित राष्ट्रपतिका विषयमा गठबन्धनमा दलसँग छलफल हुने प्रचण्डले बताए ।