निर्वाचन प्रयोजनका लागि भारत सरकारले दुई सय गाडी नेपाल पठाउँदै, आयोगलाई ८० वटा दिएर बाँकी सरकारले चलाउने

१५ कात्तिक, काठमाडौं ।  आगामी मंसिर ४ गते हुने प्रदेश र प्रतिनिधिसभा निर्वाचन प्रयोजनका लागि भारत सरकारले नेपाल सरकारलाई दुई सय गाडी दिने भएको छ । निर्वाचन आयोग र सरकारले निर्वाचनमा विदेशी मुलुक र दातृ संस्थाहरुसँग निर्वाचन प्रयोजनका लागि कुनै पनि सहयोग नलिने भनेपनि भारत सरकारसँग करिब २ सय थान गाडी सहयोग लिने भएको हो ।

‘आयोगले आसन्न निर्वाचनका लागि भारत सरकारसँग २ सय थान सवारी साधन सहयोग लिन लागेको हो’, स्रोतले भन्यो । स्रोतका अनुसार आयोगले भारतीय राजदूतावासलाई पत्राचार नै गरेर गाडी सहयोग मागेको थियो । ‘केही दिनमा ती गाडी नेपाल आउनेछन्’, आयोग स्रोतले भन्यो । सरकारले गाडी किन्न प्रयाप्त बजेट नदिएको भन्दै आयोगले विदेशी सहयोग मागेको थियो । जसमा भारत सरकारलाई पत्राचार गरिएकोमा २ सय गाडी दिन भारत सरकार तयार भएको थियो ।

ऐन नियम निर्माणदेखि सुरक्षासम्मै सहयोग लिने गरेको आयोगले पछिल्लो पटक निर्वाचन प्रयोजनकै लागि भनेर कुनै पनि सहयोग नलिने जनाएको थियो । तर आयोग उच्च स्रोतका अनुसार निर्वाचन प्रयोजनका लागि गाडी अभाव भएपछि तत्कालका लागि खरिद गर्न पनि असम्भव देखिएकाले भारत सरकारसँग २ सय थान गाडी सहयोग लिन लागेको हो । जसमध्ये एक सय २० वटा गाडी सरकारलाई दिने र ८० वटा गाडी आयोगले चलाउने भएको छ ।

‘संविधानसभा र स्थानीय तहको निर्वाचनमा त्यस्ता खालका सहयोग लिने गरिएको थियो । अहिले पनि सो सहयोग लिन लागिएको हो’, आयोग स्रोतले भन्यो । संविधानसभाको दोस्रो निर्वाचनपछि निर्वाचनकै लागि विदेशी सहयोग आउने क्रम घटेको थियो । तर विगतदेखि लिइँदै आएको सहयोगले परेको प्रभाव भने कम भएको छैन ।

संविधानसभाको पहिलो निर्वाचनदेखि सहयोगको ओइरो लागे पनि त्यसको सही सदुपयोग नभएकोमा आयोग र सरकारमाथि आलोचना हुने गरेपछि आयोगलाई सहयोगको कमी हुँदै आएको थियो । विदेशी दाताको सहयोग लिएर आयोगले सबै निर्वाचन कानुन निर्माण गरेको छ । त्यस्तै निर्वाचन सुरक्षामा समेत त्यस्ता सहयोग परिचालन हुने गरेको छ ।

दातृ निकाय र छिमेकी देशले दिने सहयोगमा स्वार्थ रहँदारहँदै पनि विश्वव्यापीकरणकै कारण सहयोग लिनु नेपालको लागि आवश्यक बनेकाले सहयोग लिन लागिएको स्रोतको दावी छ । वैशाख ३० गतेका लागि तय भएको स्थानीय तहको निर्वाचनका लागि सरकारले ८ अर्ब ११ करोड रुपैयाँ आयोगलाई उपलब्ध गराएको थियो अहिले सो भन्दा बढी रकम उपलब्ध गराएको छ । तर पनि आयोग दाता र छिमेकीसँग सहयोगको आशा गरिरहेको छ । छिमेकी तथा अन्य दातृ निकायसँग कूटनीतिक सम्बन्ध राम्रो बनाउने भन्दै सरकारले निर्वाचनमा त्यस्ता सहयोगहरु बिना रोकतोक लिने गरेको छ ।

आयोग र सरकारले पनि ती निकायलाई सरसामाग्रीको सहयोगका लागि आग्रह गर्ने गरेको छ । कतिपय दाता र छिमेकी देशको अनुरोधमै पनि ती सहयोग स्वीकार गर्ने गरिएको छ । ०७४ सालको स्थानीय तहको निर्वाचनमा पनि मसी, गाडी, डटपेन र स्वस्तिक छापदेखि प्राविधिक सहयोगसमेत बाह्य मुलुक र दातृ निकायबाट प्राप्त भएको थियो । गत स्थानीय तहको निर्वाचनमा भने आफ्नै रकम खर्च भएको थियो । निर्वाचन आयोगले त्यतिबेला पनि भारत सरकारसँग गाडी मागेको थियो । तर प्राप्त हुन सकेको थिएन ।

युएनडीपी, युएसएड र एसिया फाउण्डेशनले सहयोगका लागि चासो देखाएको भएपनि अहिलेलाई भारत सरकारबाट आउने गाडी मात्रै सहयोग लिन लागिएको आयोग स्रोतको दावी छ । आयोगले वैशाखको स्थानीय तहको निर्वाचनका लागि भारत सरकारलाई ८० वटा गाडी उपलब्ध गराउन अनुरोध गरेको थियो । तर त्यतिबेला गाडी नआएपछि भाडामा लिएर काम चलाइएको थियो । अहिलेचाहि समयमै गाडी सहयोग मागिएकाले करिब २ सय वटा गाडी पठाउने तयारी गरेको भारतीय राजदूतवास स्रोतले जनाकारी दिएको छ ।