नवलपरासीमा माओवादी केन्द्रका २ बागी उम्मेदवार पछि हटे

१५ कात्तिक, परासी । नवलपरासीमा (माओवादी केन्द्र)बाट बागी बनेका २ जना उम्मेदवार चुनावी मैदानबाट पछि हटेका छन् । नवलपरासी निर्वाचन क्षेत्र नं. १ को प्रतिनिधिसभा सदस्यमा उम्मेदवारी दिएकी सीता बौडेल र सोही निर्वाचन क्षेत्रको प्रदेशसभा ‘क’ का उम्मेदवार चन्द्रकान्त ढकालले विज्ञप्ति निकालेर उम्मेदवारी निष्क्रिय बनाएको जानकारी दिएका हुन् ।

नवलपरासी जिल्ला सहइञ्चार्जसमेत रहेकी बौडेलले सोही निर्वाचन क्षेत्रबाट २०६४ सालमा संविधानसभा निर्वाचन जितेकी थिइन् । ढकाल पार्टीका प्रदेश परिषद् सदस्य हुन् ।

उनीहरुले गठबन्धनविपरीत कांग्रेसले अनाधिकृत रुपमा उम्मेदवार दर्ता गरेकाले पार्टीलाई दबाब दिन र आन्दोलनको रक्षाका लागि उम्मेदवारी दर्ता गर्नु परेको विज्ञप्तिमा उल्लेख गरेका छन् । सत्तागठबन्धनले सो निर्वाचन क्षेत्रको प्रतिनिधिसभा र प्रदेशसभा ‘क’ नेपाली कांग्रेस र प्रदेशसभा ‘ख’ माओवादी केन्द्रको भागमा परेको थियो ।

तर सहमतिविपरीत प्रदेशसभा ‘ख’ मा नेपाली कांग्रेसका देवकरण जयसवालले रुख चिन्हबाटै उम्मेदवारी दिएपछि उनीहरुले स्वतन्त्रबाट उम्मेदवारी दर्ता गराएका थिए ।

तोकिएको समयमा उम्मेदवारी फिर्ता नलिएपछि माओवादी केन्द्रले बागी उम्मेदवारहरुलाई आफ्नो उम्मेदवारलाई चुनावी प्रक्रियामा निष्क्रिय पार्न पत्र काटेको थियो ।