तोसिमा कार्कीको रिटमा सुनुवाई जारी

१५ कात्तिक, काठमाडौं । निर्वाचन आयोगको निर्णय खारेजीको लागि अन्तरिम आदेशको मागसहित सर्वोच्च अदालतमा दायर डा. तोसिमा कार्कीको रिट निवेदनमाथि सुनुवाई शुरु भएको छ ।

न्यायाधीश डा. कुमार चुडालको एकल इजलासमा पेसीको रोलक्रम १०औं नम्बरमा परेको रिटमा अहिले सुनुवाई जारी रहेको छ ।

सुनुवाईपछि आजै रिट निवेदकको माग बमोजिम निर्वाचन आयोगको निर्णय कार्यान्वयन रोक्नेबारे अल्पकालीन वा अन्तरिम आदेश के दिने ? भन्नेबारे टुंगो लाग्नेछ ।

रिट निवेदक कार्कीले ललितपुर क्षेत्र नं. ३ बाट प्रतिनिधिसभा सदस्यका लागि राष्ट्रिय स्वतन्त्र पार्टीबाट दर्ता भएको उम्मेदवारीलाई निर्वाचन आयोगले लाभको पदमा रहेर उम्मेदवार बन्न नपाउने जनाउँदै खारेज गरिदिएपछि खारेजी निर्णयलाई बदरसहित अन्तरिम आदेशको मागसहित आइतबार सर्वोच्चमा रिट दायर गराएकी थिइन् ।

अहिले कार्कीको पक्षबाट कानुन व्यवसायीहरुले बहस गरिरहेका छन् । रिट जारी भएमा कार्कीको उम्मेदवारी कायम रहनेछ ।