नगरकोट सडक निर्माणमा ढिलाइ गरेपछि स्थानीय पुनः प्रदर्शनमा

१६ कात्तिक, भक्तपुर । भक्तपुरको नगरकोट सडक निर्माणमा ढिलाइ भएको भन्दै दुई घण्टा सडक अवरुद्ध गरिएको छ । सो क्षेत्रका विभिन्न राजनीतिक पार्टीका उम्मेदवारहरूको सहभागितामा नगरकोट सडक जाने भक्तपुर कमलविनायक भत्केको पाटीमा बुधबार बिहान ८ बजेदेखि दुई घण्टा सडक अवरुद्ध गरिएको थियो ।

नगरकोट नाल्दुम पर्यटन विकास समितिको अगुवाइमा भएको कार्यक्रममा सत्ता गठबन्धन, एमाले, राप्रपालगायतबाट सो क्षेत्रमा उम्मेदवारी दिएका उम्मेदवारहरूले सहभागिता जनाएका थिए ।

यो सडक चौडा र पिचको काम गरिरहेका ठेकेदार कम्पनीका संचालकहरुले पहुँचको बलमा वर्षौं समय व्यतित गर्दै म्याद थप गरी ठूलो मात्रामा बजेट खर्च गराउने कार्यबाट सडक छेउका बासिन्दा धुलोबाट पीडित छन् भने भक्तपुर–नगरकोट रुटका यात्रु सास्ती खेप्न विवश हुँदै आएका छन् । यसअघि पनि सडक निर्माण कार्य तोकिएकै समयमा पूरा गर्न माग गर्दै पटकपटक सडकमा प्रदर्शन गर्दै आइरहेका छन् ।