एमालेबाहेक अर्को राष्ट्रिय शक्तिलाई जिताए देशका लागि दुर्भाग्य हुन्छः ओली

१६ कात्तिक, काठमाडौं । नेकपा एमाले अध्यक्ष केपी शर्मा ओलीले आगामी प्रदेश र प्रतिनिधिसभाको निर्वाचनमा नेकपा एमालेलाई छाडेर सत्ता गठबन्धनलाई जिताए त्यो देशका लागि दुर्भाग्य हुने बताएका छन् । उनले देशलाई दुर्भाग्यमा जानबाट बचाउनका लागि एमाले नेतृत्वको गठबन्धनलाई मत दिनुपर्ने बताएका छन् ।

बुधबार काठमाडौं–१ मा पार्टीका उम्मेदवार किरण पौडेलको प्रचार कार्यक्रमलाई सम्बोधन गर्दै अध्यक्ष ओलीले यस पटक नेकपा एमालेबाहेकको राष्ट्रिय शक्तिलाई जनताले मतदान गर्न नहुने बताए । आगामी निर्वाचनमा एमालेलाई देशको राष्ट्रिय शक्ति नबनाए देशले दुर्भाग्य खेप्नुपर्ने उल्लेख गर्दै ओलीले अहिलेको सत्ता गबठन्धनले नै पुनः देशको नेतृत्व गरेको खण्डमा देशको विकास सम्भव नहुने दावी गरे ।

ओलीले यसपल्ट जनाताले नेकपा एमाले पार्टीबाहेक अर्को शक्तिलाई राष्ट्रिय शक्ति बनाउन नहुने भन्दै एमालेलाई नै त्यो राष्ट्रिय शक्तिका रुपमा जनताले पठाउनुपर्ने बताए । देशका लागि राष्ट्रिय शक्ति निर्माण गर्न एकदमै जरुरी रहेको र अहिले राष्ट्रिय शक्ति एमाले बनेन्,एकल बहुमत आएन भने देश दुर्भाग्यमा जाने ओलीको भनाइ छ ।

उनले कसैगरी पनि अहिले सत्तामा रहेका दलहरुलाई फेरी पनि सत्ताको जिम्मा दिन नहुने भन्दै अहिलेको सत्ता गठबन्धनमा रहेका दल र नेताहरु कोही पनि जनताले छानेर पठाएको नभएको ठोकुवा गरे । ओलीले कांग्रेस माओवादी लागायतका नेताहरु परमादेशी भएको र किर्ते मुद्दा बनाएर सरकार हडपेको बताए ।

उनले भने,‘सबैभन्दा बढी जाली, कीर्तेहरुले जित्ने होइन । यी त जालीकीर्ते हुन् । सरकार बनाउने संसद्को कुरा अदालतमा लगेर मुद्दा जितेर ल्यायौँ भने । प्रधानमन्त्री अदालतले हटाउँदैन । संसद्को के काम ? प्रधानमन्त्री अदालतले नियुक्त गर्छ भने । चुनावको के काम ? संसद्को के काम ? नेपालको अदालतको हालत देख्दा अचम्म लाग्छ । त्यसदिनयता अदालत बेहाल अवस्थामा छ ।’