मन्त्री नै ट्राफिक नियम उल्लंघनमा !

१४ कात्तिक, बारा । निजगढ नगरपालिका-१ स्थित सिंगौलमा चुनावी प्रचारप्रसार गर्न एक एक मन्त्रीले ट्राफिक नियमको उल्लंघनप्रति बेपर्वाह बनेका छन् । बहालबाला खानेपानी मन्त्री उमाकान्त चौधरी बारा-१ का उम्मेदवार हुन् । उनलाई बुधबार हेलमेट नलगाई चलाइएका मोटरसाइकलमा बसेर चुनाव प्रचारमा दौडिरहेको फेला पारिएको छ ।

मन्त्री चौधरी सवार मोटरसाइकलका चालकले हेलमेट नलगाई सवारी चलाएका थिए । मन्त्रीको यस्तो व्यवहार देखेर मतदाताहरूले नियम कानुनले ठूलाबढाुलाई नछुने हो कि के हो भनेर प्रश्न गरेका छन् ।

निजगढबाट सिंगौल जाने क्रममा मन्त्रीले ट्राफिक नियमविपरीत हेलमेट नलगाइएको बाइकमा सवार भइरहँदा प्रहरीले समेत उनलाई रोकेनन् । बरु, नदेखेझैं बने ।नियम उल्लंघन भएकामा उनलाई गल्ती महसुस गर्नु त परै जाओस्, बाटाेमा भेट भएकाहरूलाई हात हल्लाउँदै अभिवादन गरिरहेका थिए ।