स्वतन्त्र पार्टीको लाइन : राजनीतिक दलबाहिरका वंशज नागरिक राष्ट्रपति

१७ कात्तिक, काठमाडौं । रबि लामिछाने नेतृत्वको राष्ट्रिय स्वतन्त्र पार्टीले राष्ट्रपति बन्न कुनैपनि राजनीतिक दलमा नलागेको व्यक्ति हुनुपर्ने लाइन लिएको छ । आज राजधानीमा पार्टीको तर्फबाट आसन्न चुनावी घोषणापत्रको रुपमा वाचापत्र सार्वजनिक गर्दै पार्टीका अध्यक्ष रबि लामिछानेले पार्टीकाे सो लाइनबारे बताएका हुन् ।

वाचापत्रमा कुनैपनि राजनीतिक दलमा नलागेको र राजनीतिक लाभ नलिएको १० वर्ष पूरा भएको व्यक्तिलाई राष्ट्रपति बनाउने प्रस्ताव गरिएको छ ।

राष्ट्रपति बन्न वंशज नेपाली नागरिक हुनुपर्ने उल्लेख गरिएको वाचापत्रमा लेखिएको छ, ‘कुनैपनि राजनीतिक दलमा नलागेको वा राजनीतिक लाभ नलिएको १० वर्ष पूरा भएको वंशज नेपाली नागरिक हुनुपर्ने ।’

वडाध्यक्षदेखि संघीय संसदसम्म सम्मिलित वृहत निर्वाचन मण्डलबाट राष्ट्रपति निर्वाचित हुने पत्रमा लेखिएको छ ।