दुई किशोरीमाथि सामूहिक बलात्कारको आरोपमा ९ जना पक्राउ

१७ कात्तिक, बुटवल । रुपन्देहीमा २ किशोरीमाथि सामूहिक बलात्कार गरेको आरोपमा प्रहरीले ९ जनालाई पक्राउ गरेको छ । जिल्लाको कञ्चन गाउँपालिका-२ गोफ्लापुरमा १५ र १६ वर्षीया किशोरीलाई बुधबार राति अपहरण गरी बलात्कार गरेको आरोपमा उनीहरुलाई पक्राउ गरेको हो ।

घटनामा संलग्नमध्ये सैनामैना नगरपालिका-१० का १८ वर्षका बबि पाण्डे, २६ वर्षीय रामबहादुर बिक, सैनामैना–११ बनकट्टिकी १९ वर्षीय पदम कार्की र गैडहवा गाउँपालिका-८ का १८ वर्षीय राहुल परियारलगायत पक्राउ परेको प्रहरीले जनाएको छ ।

बुधबार गाउँमा लागेको सांस्कृतिक कार्यक्रम हेरेर फर्कने क्रममा ती किशोरीहरुलाई १०/१२ जनाको समूहले गैडहवा गाउँपालिका–२ कुलीचौरस्थित कञ्चन खोलाको बगरमा पुर्याई सामूहिक बलात्कार गरेको प्रहरीको दाबी छ । फरार अन्यको खोजी भइरहेको र पीडित किशोरीको मेडिकल जाँच भइसकेको जनाइएको छ ।