सर्वोच्चको आदेशपछि तोसिमा कार्की चुनावी प्रचारमा उत्रिइन्

१८ कात्तिक, काठमाडौं । सर्वोच्च अदालतले तत्काल उम्मेदवारी खारेज नगर्न निर्वाचन आयोगको नाममा आदेश दिएपछि ललितपुर ३ बाट प्रतिनिधिसभाा सदस्यका लागि उम्मेदवारी दिएकी राष्ट्रिय स्वतन्त्र पार्टीकी डा. तोसिमा कार्कीले प्रचारप्रसार तीव्र बनाएकी छन् ।

उनको उम्मेदवारी खारेजीमा माग गरेर परेको रिटमा गत मंगलबार सर्वोच्च अदालतका न्यायाधीश कुमार चुडालको एकल इजलासले कार्कीको उम्मेदवारी खारेज गर्ने निर्णय तत्काल कार्यान्वयन नगर्न निर्वाचन आयोगको नाममा अन्तरिम आदेश जारी गरेको थियो । अदालतले उम्मेदवारी खारेज गर्नुपर्ने कारणबारे आयोगसँग लिखित जवाफ समेत मागेको छ ।

अदालतको उक्त आदेशपछि उम्मेदवार कार्कीले प्रचारप्रसारमा तीव्रता दिएकी हुन् । आफूले जित्ने भएपछि षड्यन्त्र गरिएको र त्यसलाई न्यायालयले रोकेको कार्कीले बताएकी छन् । अबको चुनाव आफूले जित्ने दाबी गरेकी छन् ।

ललितपुर–३ बाट सत्तारुढ गठबन्धनबाट उम्मेदवार बनेकी बहालवाला मन्त्री समेत रहेकी माओवादी केन्द्रकी पम्फा भुसालसहितका उम्मेदवारसँग प्रतिस्पर्धामा उत्रिएका कार्कीले घरदैलो कार्यक्रममा मतदाताले देखाएको माया र सद्भावले उत्साहित भएको प्रतिक्रिया दिएकी छन् ।

अदालतको आदेशपछि उनी घरदैलोसहितका कार्यक्रममा सक्रिय भएकी छन् । घण्टी चुनाव चिह्न लिएर मैदानमा उत्रिएकी उनी ‘स्वस्थ नेपाली सुखी नेपाली’ नारा लिएर मतदाताकोमा पुगेकी छन् ।

चुनावी प्रचार र घर दैलो कार्यक्रममा उनलाई पार्टीका अध्यक्ष रबि लामिछाने सहभागी भएका छन् । लामिछानेले मतदातासँग डा. कार्कीलाई जिताउन आग्रह गरे ।

रवि लामिछाने नेतृत्वको सो पार्टीले प्रत्यक्ष निर्वाचित प्रधानमन्त्री, राजनीतिक दलमा नलागेका व्यक्ति राष्ट्रपति, संवैधानिक परिषद् खारेजलगायतका विषय समेटेर बिहीबार मात्र वाचापत्र सार्वजनिक गरेको थियो ।