सुशासन र आर्थिक विकासका लागि गठबन्धन : प्रकाशमान सिंह

१८ कात्तिक, काठमाडाैं । नेपाली कांग्रेसका नेता प्रकाशमान सिंहले मुलुकमा राजनीतिक स्थिरता, सुशासन र आर्थिक विकासका लागि गठबन्धन निर्माण भएको बताएका छन् ।

मंसिर ४ गते हुने प्रतिनिधिसभा तथा प्रदेशसभा निर्वाचनका लागि नेपाली कांग्रेस काठमाडौं क्षेत्र नं. १ ले आज यहाँ आयोजना गरेको घरदैलो कार्यक्रममा उनले मुलुकमा राजनीतिक स्थिरता, सुशासन र आर्थिक विकासका लागि गठबन्धन निर्माण भएकाले आगामी निर्वाचनमा उक्त गठबन्धनले जित्नुपर्ने बताए ।

‘संविधानको रक्षा र संविधानले दिएको अधिकारलाई संस्थागत गर्न सबै क्षेत्रमा गठबन्धनका उम्मेदवार विजयी हुनुपर्छ’, नेता सिंहले भने, ‘निर्वाचनलाई निष्पक्ष, धाँधलीरहित र स्वतन्त्ररुपमा सम्पन्न गर्न सबै राजनीतिक दलको भूमिका महत्वपूर्ण रहेको छ । यसैगरी आचारसंहितालाई ख्याल गरेर चुनावी अभियान सञ्चालन गर्नुपर्छ ।’

पूर्वउपप्रधानमन्त्रीसमेत रहेका नेता सिंहले नेपाली जनताको लामो त्याग, बलिदान र संघर्षबाट निर्माण भएको संविधानको रक्षा र शान्ति प्रक्रियालाई तार्किक निस्कर्षमा पुर्याउन वाम-लोकतान्त्रिक गठबन्धनको आवश्यकता रहेको बताए । चुनाव जितेर अहिलेकै गठबन्धनले सरकार बनाउने उनको दाबी थियो ।

सत्ता गठबन्धनका साझा उम्मेदवार सिंहसँग राप्रपाका रविन्द्र मिश्र, एमालेका किरण पौडेल, राष्ट्रिय स्वतन्त्र पार्टीका पुकार बमलगायतसँग चुनाव प्रतिस्पर्धा गर्दैछन् ।