सन्दीप लामिछाने नाबालिग बलात्कार मुद्दामा जेल चलान

१८ कात्तिक, काठमाडौं । १७ वर्षीया नाबालिगमाथि बलात्कार गरेको आरोप लागेका क्रिकेटर सन्दीप लामिछाने जेल चलान भएका छन् । मुद्दाको अन्तिम टुंगो नलागिन्जेलसम्मका लागि उनलाई पुर्पक्षको लागि कारागार पठाउन जिल्ला अदालत काठमाडाैंले आदेश दिएको हो ।

गौशाला प्रहरी वृत्तले जिल्ला सरकारी वकिलको रायमा अदालतमा दायर मुद्दामा न्यायाधीश माधवप्रसाद घिमिरेको इजलास तीन दिनसम्म भएको बहसपछि लामिछानेलाई बिहीबार जेल पठाउने आदेश दिएको हो । आदेशबमाेजिम लामिछानेलाई केन्द्रीय कारागार चलान गर्ने तयारी भइरहेको प्रहरीले जनाएको छ ।

नाबालिगले आफू गएको भदौ ५ गते राति काठमाडौंको पिंगलास्थानस्थित होटल काठमाडौं इनको कोठा नम्बर ३०५ मा राखेर राति पटकपटक बलात्कार गरेको भन्दै न्यायका लागि प्रहरी वृत्त गौशालामा जाहेरी दिएकी थिइन् ।

जाहेरीको आधारमा लामिछानेलाई गएको असोज २० मा त्रिभुवन अन्तर्राष्ट्रिय विमानस्थलबाट पक्राउ गरी जबर्जस्ती करिणी कसुरमा अदालतबाट पटकपटक म्याद थप गरी अनुसन्धान गरेको थियो ।

अनुसन्धानपछि जिल्ला सरकारी वकिलको रायमा उनीविरुद्ध सोमबार १२ वर्ष कैदसजाय र पीडित नाबालिगकलाई उचित क्षतिपूर्तिको मागदाबीसहित मुलुकी संहिता २०७४ को दफा २१९ (२) बमोजिम मुद्दा दायर गरेको थियो ।

अनुसन्धानका क्रममा अभियुक्त लामिछानेले आफूलाई नाबालिगमाथि करिणी नगरेको भन्दै निरन्तर रुपमा इन्कारी बयान दिँदै आएपनि उनलाई मुद्दा अन्तिम किनारा नलागिञ्जेलसम्मका लागि जेलमा राख्न आदेश भएको हो ।