‘मिचिएको भए’ लिम्पियाधुराहितको जमिन फिर्ता ल्याइन्छः ओली

१८ कात्तिक, दार्चुला । नेकपा एमालेका अध्यक्ष केपी शर्मा ओलीले कुनै पनि छिमेकीलाई नेपालको भूमि एक इन्च पनि मिच्न नदिने बताएका छन् । ओलीले कालापानी, लिपुलेक र लिम्पियाधुरा भारत सरकारले मिचेकै हो र त्यो फिर्ता दिनुपर्छ नभनि नेपाली भूमी ‘मिचिएको’भए फिर्ता ल्याएरै छाड्ने बताए । आगामी प्रदेश र प्रतिनिधिसभा निर्वाचनको दार्चुलाबाट चुनावी अभियान सुरु गर्दै उनले नेपालको भूमि ‘मिचिएको’ भए फिर्ता ल्याउने बताएका हुन् ।

राष्ट्रियताको प्रश्नमा नेपालले आफ्नो एक इन्च जमिन पनि कसैलाई छोड्नेवाला भन्दै ओलीले भने, ‘मिचिएको भए फिर्ता ल्याउँछौँ भनेर हामीले नक्सा जारी गरेका छौँ । संसदले सर्वसम्मतले पास गरेको छ । त्यो कुरा आज फेरि तपाईंहरुसँग ग्यारेन्टी गर्न चाहन्छु ।’ ओली प्रधानमन्त्री बनेका बेला आफुले लिपुलेक, कालापानी लिम्पियाधुरासहितको भूमि समेटेर नयाँ नक्सा जारी गरेको बताए ।

पूर्व प्रधानमन्त्रीसमेत रहेका ओलीले कालापानी, लिपुलेक र लिम्पियाधुरा फिर्ता ल्याएरै छाड्ने दाबी गरेपनि कार्यक्रम भर उनले भरतले मिचेकै हो भन्न भने सकेनन् । उनले मिचिएको भए भन्ने शब्दबाट आफ्नो भनाइ सिध्यााएका थिए ।

ओलीले संसदले सर्वसम्मतका साथ पारित गरेको नक्सा अनुसार जमिन फिर्ता ल्याउने बताए । भारतले कित्र्ते खोल्सीलाई महाकाली उल्लेख गरेर भारतले ६० वर्षदेखि कालापानी, लिपुलेक र लिम्पियाधुरा मिचेको विषय धेरै अगाडी देखि सार्वजनिक भइरहेको छ । भारतीय पक्षले सडक निर्माणका क्रममा खसेको ढुङ्गा लागेर १२ वर्षीय बालकको मृत्युसमेत भएको थियो । यो घटनामा गठबन्धन सरकारले केही नगरेको उनको तर्क छ ।

अध्यक्ष ओलीले छिमेकी मुलुक भारतलाई भूगोलमा ठुलो भएर सानो चित्त नबनाउन आग्रह पनि गरे । दार्चुलाका समस्याहरू आफूलाई थाहा भएको भन्दै तिङकर भन्ज्याङको चीन जोड्ने बाटोका लागि ७०, ७५ किलोमिटर चट्टान खोलेर तिङकरसम्म सडक पुयाउनुपर्ने बताए । उनले भारतले अनावश्यक ढंगले बाटो बनाएर झमेला गरेको पनि बताए ।