प्रचण्डका छुट्टै गोरखा प्रतिवद्धतापत्र : पालुङटारमा स्मार्ट सिटी, रबर उद्योग संचालन गरिने

२० कात्तिक, गोरखा । प्रतिनिधिसभा निर्वाचनका उम्मेदवार नेकपा (माओवादी केन्द्र)का अध्यक्ष पुष्पकमल दाहाल ‘‘प्रचण्ड’ले आफ्नो निर्वाचन क्षेत्रकेन्द्रित रणनीतिक योजनासहित प्रतिवद्धतापत्र अगाडि सारेका छन् । उनी गोरखा क्षेत्र नम्बर २ बाट मंसिर ४ मा चुनाव लड्दैछन् ।

निर्वाचन क्षेत्र मात्र नभई उनले गोरखाका जनताका लागि भन्दै उनले ४५ बुँदे रणनीतिक योजना समावेश गरेर आइतबार प्रतिवद्धतापत्र सार्वजनिक गरेका हुन् । रबर उद्योग संचालन गरिने, पालुङटारमा स्मार्ट सिटी बनाउने लगायत महत्वकांक्षा योजनाहरू प्रतिवद्धतापत्रमा राखेका छन् ।

गोरखा २ अन्तर्गत पर्ने सडक, शिक्षा, स्वास्थ्य, पर्यटन प्रवर्द्धन, कृषि, जडिबुटी, व्यावसायिक पशुपालन, सीपमुलक तालिम, साहित्य कला संस्कृतिको संरक्षण जस्ता बुँदा प्रतिवद्धतापत्र समेटेका छन् ।

देशकै विकास र समृद्धिका लागि नीति कार्यान्वयन गर्ने ठाउँमा पुग्ने इच्छा रहेको बताउँदै आएका प्रचण्डले यसपटक भने गोरखाबाटै आर्थिक विकास निर्माण र समृद्धिको सुरुवात हुने धारणा राखेका छन् । उनले चुनाव सत्ता गठबन्धन संविधानको रक्षा, स्थिरता र समृद्धिका लागि बनाइएको दाबी दोहोर्याएका छन् ।

चितवन २ मा मतदाता नामावली भएका उनी टिकट बाँडफाँटको अन्ँितममा गोरखा रोज्न पुगेका हुन् । गोरखामा उनका विरुद्ध पार्टीभित्रैबाट बागी उम्मेदवार दिएकामा पार्टीको बलमा सबैलाई उम्मेदवारी फिर्ता र निष्क्रिय पारिएको थियो ।

पार्टीले यसअघि नै केन्द्रीय तहबाट प्रचण्ड स्वयंले निर्वाचनका लागि प्रतिवद्धतापत्र सर्वाजनिक गरिसकेको अवस्थाबीच आफ्नै निर्वाचन क्षेत्रका लागि छुट्टै प्रतिवद्धतापत्र ल्याएका हुन् ।