रामकुमारी झाँक्रीलाई मतदान गर्न एमाले प्रदेश कमिटी सदस्यको अपिल

२० कात्तिक, काठमाडौं । नेकपा (एमाले) लुम्बिनी प्रदेश कमिटी सदस्य शेषकान्त गौतमले गुल्मी क्षेत्र नं. २ बाट नेकपा (एकीकृत समाजवादी)की प्रतिनिधिसभा सदस्य उम्मेदवार रामकुमारी झाँक्रीलाई मतदान गर्न अपिल गरेका छन् ।

आइतबार विज्ञप्ति जारी गर्दै गौतमले झाँक्री कम्युनिष्ट आन्दोलनका क्रममा लामो समय नजिकबाट सँगै काम गरेको र सिंगो व्यवस्था र लोकतान्त्रिक आन्दोलनमा महत्वपूर्ण योगदान पुर्याउने क्रान्तिकारी महिला नेतृ रहेको उल्लेख गरेका छन् ।

झाँक्री सत्ता गठबन्धनको समर्थनमा एकीकृत समाजवादीबाट साझा उम्मेदवार छिन् । एकीकृत समाजवादी एमालेबाट अलग भएका माधवकुमार नेपाल नेतृत्वको पार्टी हो । उसले आगामी ४ मंसिरको चुनावका लागि कलम चिह्न पाएको छ ।

पूर्वमन्त्री समेत रहेकी झाँक्रीसँग एमालेबाट पूर्वमन्त्री गोकर्ण विष्टले चुनावी प्रतिस्पर्धा गर्दैछन् । २०३९ सालदेखि अनेरास्ववियुबाट राजनीतिक जीवन सुरु गरेका गौतम यसपटकको निर्वाचनमा उक्त क्षेत्रबाट उम्मेदवारका रुपमा पार्टीबाट सिफारिस भएका थिए । तर, स्थानीय कमिटीको सिफारिस टोकरीमा पुर्याउँदै एमाले अध्यक्ष केपी शर्मा ओलीले विष्टलाई उम्मेदवार बनाएपछि उनी रुष्ट छन् ।