गृहको चेतावनीबाबजुद विप्लवले ल्याए संघर्षका कार्यक्रम, नेता कार्यकर्तामाथि सुरक्षा निगरानी

२० कात्तिक, काठमाडौं । विप्लव नेकपासहित तीन पार्टीले संघर्षका कार्यक्रम सार्वजनिक गरेका छन् । आइतबार काठमाडौंमा तीन पार्टीका नेताहरुले संयुक्त रुपमा पत्रकार सम्मेलन गरेर चुनावलाई असर पुर्याउने किसिमबाट साता लामो राजनीतिक संघर्षका कार्यक्रमहरु सार्वजनिक गरेका हुन् ।

प्रतिनिधिसभा र प्रदेशसभा निर्वाचनको विरोधमा विप्लव नेतृत्वको नेकपा, ऋषि कट्टेल नेतृत्वको नेपाल कम्युनिष्ट पार्टी र आहुति नेतृत्वको वैज्ञानिक समाजवादी कम्युनिस्ट पार्टीले संसदीय व्यवस्थाले जनतालाई पूर्ण अधिकार बनाउन नसक्ने बताउँदै यही कात्तिक २४ देखि ३० गतेसम्मका लागि राजनीतिक सभा, कोणसभा र विरोध प्रदर्शन गर्ने घोषणासहित संयुक्त रुपमा प्रेस विज्ञप्ति जारी गरिएको छ ।

काठमाडौंमा २४ गते राजनीतिक सभाको आयोजना गर्ने घोषणा गरिएको छ । २४ देखि २६ सम्म बुटवल, बर्दिबास, इटहरी, पोखरा, धनगढी लगायत शहरहरुमा र कात्तिक २६ गतेदेखि ३० गतेसम्म देशभर कोणसभा र विरोध प्रदर्शन गर्ने विज्ञप्तिमा उल्लेख छ । ३० गतेपछि जिल्ला र स्थानीय स्तरमा आवश्यकता र सापेक्षताका आधारमा आवश्यक कार्यक्रम संचालन गरिने विज्ञप्तिमा उल्लेख छ ।

स्मारणीय छ, तीन पार्टीमध्ये विप्लव नेकपा भने २०७४ को आम निर्वाचन बहिष्कार गरेको नेकपा गएको वैशाख ३० मा सम्पन्न स्थानीय तहको चुनावमा भने सामेल भएको थियो । पत्रकार सम्मेलनमा विप्लव भने सहभागी थिएनन् । उनी हालै सम्पन्न महािधवेशनबाट चयन भएका नेकपाका महासचिव हुन् ।

यता सरकारले चुनावमा भाग नलिने अधिकार भएपनि बिथोल्ने अधिकार कसैलाई नभएको भन्दै बिथोल्न खोज्नेमाथि सरकार कडा रुपमा प्रस्तुत हुने बताइरहेको छ । गहृमन्त्री बालकृष्ण खाणले शुक्रबार चुनाव बिथोल्ने जोकोहीलाई निगरानीमा राखिने र आवश्यक परे कडा निर्णय लिने बताइसकेका छन् ।

गृहसचिव विनाेद प्रकाश सिंहले पनि प्रदेश नम्बरको १ को सुरक्षा बैठकमा चुनाव बिथोल्नहरुमाथि कडा निगरानी राख्न र आवश्यकता अनुसार निर्णय लिएर चुनावलाई सुचारु बनाउन सबै सुरक्षा निकाय सुरक्षा अधिकारीहरुलाई निर्देशन दिइसकेका छन् ।

यसैबीच विरोधका कार्यक्रम सार्वजनिक भएसँगै सरकारले तीन वटै पार्टीका नेता कार्यकर्तामाथि अपनाउने रवैयाबारे छलफल गर्न सुरक्षा बैठकको तयारी गरेको बताइएको छ ।