हामी चाँडै प्रधानमन्त्री तोक्छौँ, अब ओलीका दिन सकिएः प्रचण्ड

२२ कात्तिक, काठमाडौं । चुनावी अभियानका क्रममा देश दौडामा रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेकपा एमालेका अध्यक्ष केपी शर्मा ओली आगामी निर्वाचनपछि अस्तित्वमा नै नआउने बताएका छन् । उनले चुनावपछि सरकारको नेतृत्व गर्न गठबन्धनले चाँडै प्रधानमन्त्रीको उम्मेदवार तोकिने पनि बताएका छन् ।

गोरखाबाट सुर्खेत जाने क्रममा मौसमको खराबीका कारण मंगलबार बिहान सल्यानमा आकस्मिक अवतरण गरेका दाहालले प्रेस सेन्टर सल्यानले गरेको पत्रकार भेटघाट कार्यक्रममा निर्वाचनपछि संघ र प्रदेशमा गठबन्धनकै सरकार बन्ने बताउँदै सत्ता गठबन्धनको प्रधानमन्त्री को बन्ने भन्नेमा चाँडै टुंगो लगाउने बताए । लगत्तै उनी जुम्लामा आयोजित चुनावी सभालाई सम्बोधन गर्न पुगेका थिए ।

उनले जुम्लामा आयोजित चुनावी सभालाई सम्बोधन गर्दै एमाले अध्यक्ष केपी ओलीलाई चुनावपछि अस्तित्ववमा नै नआउने चेतावनी दिए । प्रचण्डले दुईतिहाइको सरकार बचाउन नसक्ने, संविधानमाथि घात गर्ने, संसद् विघटन गर्ने र पार्टी विघटन गरेर धुजाधुजा पार्ने ओली यो निर्वाचनबाट पत्तासाफ हुने बताए । उनले ओली राजनीतिमा असफल भइसकेको भन्दै जनताको अगाडि उनले पश्चाताप गर्नुपर्ने बताए ।

प्रचण्डले अब राजनीतिक स्थिरता र आर्थिक विकास आवश्यक रहेको भन्दै ७० वर्षसम्म लडेर ल्याएको संविधानलाई च्यात्ने दुस्साहस केपी ओलीले गरेको र संविधान मिचेर लोकतन्त्रका आधारभूत मूल्यमान्यता भत्काउने काम गरेकाले यो गठबन्धन बनेको बताए । अब नयाँ नेपाल निर्माण गर्ने अभिभारा पनि गठबन्धन दललाई नै भएको भन्दै उनले गठबन्धनको पक्षमा मत खसाल्न आग्रह गरे ।

मंसिर ४ गते दुई विचार, दुई प्रवृत्ति, दुई संस्कृति र दुई गठबन्धन आमनेसामने भएको बताउँदै उनले भने, ‘एउटा गठबन्धन ७० वर्ष लडेर प्राप्त गरेका अधिकार रक्षा गर्न चाहने र अर्को संविधान तथा जनताले पाएको अधिकार उल्ट्याउन चाहने गठबन्धन छ । त्यसैले यो निर्वाचनमा सामान्य औपचारिक निर्वाचनको अभ्यास मात्रै छैन । जनताले जनताको अधिकारको रक्षा गर्ने कि यसलाई उल्ट्याउने भन्नेका बिचको लडाइँको रुपमा मंसिर ४ को निर्वाचन छ ।’

अर्को गठबन्धनलाई भोट दिनु भनेको निरंकुशता र अराजकताको भूमरीतर्फ जानु भएको भन्दै उनले देशलाई फेरि विघटन र प्रतिगमनतिर जान नदिन सचेत भएर वामलोकतान्त्रिक गठबन्धनको पक्षमा भोट खसाल्नसमेत आग्रह गरे । प्रचण्डले कर्णालीबाट प्रतिगमनकारी, निरंकुशतावादी र सामान्तवादीलाई शून्य बनाएर छाड्नुपर्नेमा जोड दिए ।

उनले कर्णालीको सडक पिचमात्रै होइन फराकिलो बनाउने, आर्थिक गतिविधि र व्यापार व्यवसायको विकासका निम्ति त्यो बाटो बनाउने प्रतिबद्धता जाहेर गरे । उनले पहिले बिरामी ओसारिन्थ्यो, अहिले डाक्टर उत्पादन गरेर देशभरिका बिरामीलाई उपचार गर्न पठाउन सक्ने भइसकेको बताए । कर्णालीको अर्गानिक उत्पादन देशभर चर्चामा भएको र गठबन्धनका पार्टीको ध्यान अहिले कर्णालीतिर बढी देखिएको उनको भनाइ थियो ।

उनले नेकपा माओवादीका प्रतिनिधिसभा उम्मेदवार गोमा कुावरलाई जिताएर पठाएमा फूलमन्त्री बनाउने सम्भावना रहेको समेत बताए । दाहालसागै मत माग्दै हिाडेका कांग्रेस उपसभापति पूर्णबहादुर खड्काले गठबन्धनका पक्षमा मतदान गर्न आग्रह गर्दै कर्णाली दौडाहमा आफू रहेको बताए । उनले रुख, हँसिया–हथौडा र कलम चिह्नमा मत हाल्न दुविधा नमान्नसमेत आग्रह गरे ।

सल्यानमा भएको पत्रकार भेटघाट कार्यक्रममा निर्वाचनपछि संघ र प्रदेशमा गठबन्धनकै सरकार बन्ने तर प्रधानमन्त्री को बन्ने भन्नेमा टुंगो लगाउन बाँकी रहेको बताएका थिए । उनले आगामी निर्वाचन अग्रगमन र प्रतिगमनबीचको लडाइँ भएको बताए । केपी ओलीले जनताको त्याग‚ तपस्या र बलिदानबाट प्राप्त संविधान ध्वस्त बनाउन थालेकाले त्यसको रक्षा गर्न गठबन्धन गर्नुपरेको जानकारी दिए ।

राजा फर्काउन भैरहेको चलखेललाई रोक्न गठबन्धनको आवश्यकता भएको बताउँदै उनले भने‚ ‘हामी बहुमत ल्याएर सरकार बनाउछौं भन्ने केपी ओलीले हल्ला फैलाएर भ्रम सिर्जना गरेका छन् । यसअघि जनताले बहुमत दिँदा सरकार चलाउन छाडेर संसद् विघटन, संविधान मिच्नेजस्ता काम गरेका उनले कुनै हालतमा बहुमत ल्याउँदैनन् ।’ यसपालि गठबन्धनको जीत सुनिश्चित छ भएको भन्दै गठबन्धनले बहुमतको सरकार बनाउनेमा आफू ढुक्क रहेको उनले बताए ।