गोंगबुबाट सालकको खपेटासहित दुई जना पक्राउ

२३ कात्तिक, काठमाडौं । काठमाडौं महानगरपालिका–२६ गोंगबु चोकबाट १० केजी ५ सय ग्राम तौल भएको सालकको खपेटासहित २ जनालाई मंगलबार प्रहरीले पक्राउ गरेको छ ।

पक्राउ पर्नेहरूमा रामेछाप दोरम्बा गाउँपालिका–७ थापागाँउ घर भएका ३८ वर्षीय प्रेम बहादुर बिक र खोटाङ अर्खल गाउँपालिका–९ घर भएका २१ वर्षीय अर्जुन मगर रहेका छन् ।

उनीहरूले सालकको खपेटा बोकी हिँडिरहेको भन्ने विशेष सूचनाको आधारमा प्रहरी प्रभाग गोंगबुबाट खटिएको प्रहरीले उक्त तौलको सालकको खपेटा फेला पारी पक्राउ गरेको हो ।

साथै प्रेम बहादुर बिक सवार बा ५८ प ८३३७ नम्बरको मोटरसाइकल र अर्जुन मगर सवार बा।प्र ०२–०२८ प ७६७२ नम्बरको मोटरसाइकल समेत प्रहरीले नियन्त्रणमा लिएको छ ।

सालक दुर्लभ वन्यजन्तुको सूचीमा पर्दछ । सालकलाई मार्न, ओसारपसार वा किनबेच गर्न कानूनले बर्जित गरेको छ ।