३० अर्ब आन्तरिक ऋण उठाउन बोलकबोल तालिका सार्वजनिक

२३ कात्तिक, काठमाडौं । सरकारले चालु वर्षको बजेटमा व्यवस्था गरिएअनुसार आन्तरिक ऋण उठाउने तयारी थालेको छ । पहिलो त्रैमासिकमा ऋण नउठाएको सरकारले दोस्रो त्रैमासिकमा ३० अर्ब रुपैयाँ बराबरको आन्तरिक ऋण उठाउने भएको हो । चालु आर्थिक वर्षको बजेटमा तय गरेको लक्ष्यअनुसार पहिलो चरणमा मंसिर र पुसमा ३० अर्ब रुपैयाँ आन्तरिक ऋण उठाउन लागिएको नेपाल राष्ट्र बैंकले जनाएको छ । वार्षिक बजेटमा २ खर्ब ५६ अर्ब आन्तरिक ऋण उठाउने लक्ष्य राखिएको छ ।

सरकारले आर्थिक वर्षको पहिलो त्रैमासमा आन्तरिक ऋण उठाएको थिएन । दोस्रो त्रैमासमा आन्तरिक ऋण उठाउनका लागि राष्ट्र बैंकले बोलकबोल तालिकासमेत सार्वजनिक गरिसकेको छ । मंसिर १३ देखि पुस ६ गतेसम्म ३० अर्ब संकलन गरिसक्ने तालिकामा उल्लेख छ । जसअनुसार ३६४ दिने ट्रेजरी बिलमार्फत १५ अर्ब र दुई, तीन, चार वर्षे विकास ऋणपत्र मार्फत १५ अर्ब गरी कुल ३० अर्ब रुपैयाँ आन्तरिक ऋण संकलन गरिनेछ ।

उल्लिखित आन्तरिक ऋणको ब्याजदर बोलकबोलबाट निर्धारण गरिने राष्ट्र बैंकले जनाएको छ । लामो समयदेखि वित्तीय प्रणालीमा लगानी योग्य रकम अभावको समस्या रहँदै आएको छ । अपेक्षित रुपमा निक्षेप संकलन हुन नसकेपछि बैंक तथा वित्तीय संस्थामा लगानीयोग्य रकमको अभाव छ । निक्षेपमा कमी आउन थाले पनि बैंक तथा वित्तीय संस्थाले निक्षेपको ब्याजदर बढाएर मुद्दती निक्षेपमा १२.१३३ प्रतिशतसम्म पुर्याएका छन् ।

यता, बैंक तथा वित्तीय संस्थाले ऋणको व्याजदरसहित सबै खाले सेवा शूल्कसमेत बढाएको भन्दै उद्योगी र व्यवसायीहरुले वित्तीय संस्थाविरुद्ध आन्दोलन चर्काएका छन् । उनीहरुले कर्जाको व्याज घटाउन माग गर्दै नघटाए वित्तीय संस्थामै तालाबन्दी गर्ने चेतावनी दिएका छन् । यही बेला सरकारले आन्तरिक ऋण उठाउन लागेको हो ।