स्याङ्जा २ ‘क’ मा एकीकृत समाजवादीले गर्याे उम्मेदवारी निष्क्रिय

२३ कात्तिक, स्याङजा । नेकपा (एकीकृत समाजवादी) का जिल्ला अध्यक्ष रामचन्द्र भट्टराईले आफ्नो उम्मेदवारी निष्क्रिय गरेका छन् । सत्ता गठबन्धनबाट स्याङ्जाको क्षेत्र नं २ ‘क’ मा उम्मेदवारी दिएका भट्टराईले पार्टीको केन्द्रीय अध्यक्षको निर्देशनबमोजिम उम्मेदवारी निष्क्रिय पारेको आज एक विज्ञप्ति जारी गरी बताएका हुन् ।

गठबन्धनमा रहेका दलमध्ये दुई दलबाट उम्मेदवारी परेपछि पार्टीका केन्द्रीय अध्यक्ष माधवकुमार नेपालको निर्देशनमा आजैका मितिदेखि आफ्नो उम्मेदवारी निष्क्रिय पारेको उनले बताएका छन् ।

स्याङ्जा क्षेत्र नं २ ‘क’ मा सत्ता गठबन्धनको तर्फबाट नेपाली कांग्रेसका भोजराज अर्यालको उम्मेदवारी छ । यो प्रदेशमा नेपाली कांग्रेस र नेकपा एमालेबीच मूख्य प्रतिस्पर्धा हुने अनुमान गरिएको छ ।

२०७४ को प्रदेशसभाको निर्वाचनमा नेपाली कांग्रेसका युवा नेता विष्णु पौडेल र नेकपा एमालेका नेता मोहनप्रसाद रेग्मीबीच मुख्य चुनावी प्रतिस्पर्धा भएको थियो । जसमा नेकपा एमालेका रेग्मी विजयी भएका थिए ।

प्रदेशसभामा विजयी भएका रेग्मीले १६ हजार ६ सय १३ मत ल्याएका थिए भने कांग्रेसका पौडेलले १३ हजार एक सय ४० मत प्राप्त गरेका थिए ।