प्रभु साहलाई समर्थन नगरेपछि माओवादीले चलायो आफ्नै उम्मेदवारमाथि डण्ड

२३ कात्तिक, चन्द्रनिगाहपुर । नेकपा (माओवादी केन्द्र)ले रौतहटको क्षेत्र नं. ३ का आफ्नै उम्मेदवारलाई साधारण सदस्य समेत नरहने गरी कारबाही गरेको छ । सत्ता गठबन्धनका तर्फबाट प्रतिनिधि सभामा माओवादी केन्द्रका उम्मेदवार बनेका रविन्द्र पटेल धिरजले उम्मेदवारी फिर्ता नलिएपछि माओवादीले उनलाई कारबाही गरेको हो ।

गठबन्धनले सिट बाँडफाँट गर्दा रौतहट ३ मा प्रतिनिधिसभा उम्मेदवार माओवादी केन्द्रको भागमा परेको थियो । तरपछि त्यस क्षेत्रमा एमाले टिकट नपाएका माओवादी केन्द्रका पूर्व नेता प्रभु साहले स्वतन्त्र उम्मेदवारी दिएपछि गठबन्धनले उनलाई सघाउने निर्णय गरेको थियो ।

तर पार्टीले निर्णय गरेपनि उम्मेदवारी कायमै राखेका पटेलले साहलाई कुनैपनि हालतमा समर्थन नगर्ने भन्दै चुनावी प्रचार प्रसारको अभियानलाई जारी राखेका छन ।

पार्टी निर्णय नमानेको भन्दै माओवादी केन्द्रले आज पटेलको सदस्यता खारेज गरेको हो । नेकपा माओवादी केन्द्रका मधेश प्रदेश इञ्चार्ज गणेश साहले पटेललाई पार्टीबाट निष्काशन गरेको बताएका छन । पटेल आजकै दिनबाट पार्टी सदस्य नरहेकाे इञ्चार्ज साहले बताए ।

उम्मेदवार पटेललाई सघाएको भन्दै माओवादी केन्द्रले पार्टी प्रदेश कमिटी सदस्य विन्देश्वर यादवलाई समेत पार्टीको साधारण सदस्य समेत नरहने गरी कारबाही गरेको छ ।