निर्वाचनमा सुरक्षाकर्मीबाहेक २,४६,९०० कर्मचारी खटाइने

२३ कात्तिक, काठमाडौं । निर्वाचन आयोगले आगामी मंसिर ४ गते हुनगइरहेको प्रदेश र प्रतिनिधिसभा निर्वाचन प्रयोजनका लागि खाटाउने कर्मचारीको संख्या तया गरेको छ । ओयोगका अनुसार मंसिर ४ को निर्वाचनका लागि देशभर २ लाख ४६ हजार ९ सय कर्मचारी खटिनेछन् ।

आयोगले केन्द्रीय कार्यालय, प्रदेश कार्यालय, ७७ जिल्ला निर्वाचन कार्यालय, मुख्य निर्वाचन र निर्वाचन अधिकृतको कार्यालय, मतदान केन्द्र र मतगणनासमेतका लागि यो संख्यामा कर्मचारी खटाउन लागेको हो । जसमा नेपाल सरकारका विभिन्न निकायमा कार्यरतसहित केही कर्मचारी अन्यत्रबाटसमेत लिएको जनाएको छ ।

आयोगले जनशक्ति व्यवस्थापन निर्देशिकाले व्यवस्था गरेबमोजिम देशभर मुख्य निर्वाचन अधिकृतको कार्यालयले कर्मचारी नियुक्ति गरिसकेको र अहिले तालिमहरू सञ्चालन भइरहेको जानकारी दिएको छ । जनशक्ति व्यवस्थापन निर्देशिकाअनुसार जिल्लामा प्रमुख जिल्ला अधिकारी संयोजकत्वमा गठित समितिहरूले निजामती सेवा र सार्वजनिक निकायमा काम गर्ने कर्मचारीलाई पदीय हिसावले विवरण लिएर सिफारिस गरिएको आयोगको भनाइ छ ।

सिफारिस भएका कर्मचारीहरूलाई मुख्य निर्वाचन अधिकृतको कार्यालयले नियुक्त गरिसकेको छ । देशभर निर्वाचनका लागि आवश्यक जनशक्ति नियुक्त भइसकेको र अहिले तालिम सञ्चालन भइरहेको भन्दै आयोगले कर्मचारीहरू मतदानको तीन दिन अगाडि नै मतदानस्थलमा पुगिसक्ने जनाएको छ ।