विप्लवले आज र लिङदेनले भोलि काठमाडौंमा सभा गर्दै

२४ कात्तिक, काठमाडौं । राजेन्द्रकुमार लिङदेन नेतृत्वको राष्ट्रिय प्रजातन्त्र पार्टी (राप्रपा) र विप्लव नेतृत्वको नेकपाले काठमाडौंमा चुनावीसम्बन्धी सभा गर्दैछन् । राप्रपाले गर्ने सभा चुनावको प्रचारकै सिलसिलामा हो भने नेकपाले गर्ने सभा चुनाव बहिष्कार अभियान अन्तर्गत हो ।

राप्रपाले आमसभा नाम दिएको छ भने नेकपाले भण्डाफोर सभा भनेको छ । नेकपाले रत्नपार्कस्थित शान्तिबाटिकामा दिउँसो १ बजे भण्डाफोर सभा गर्दैछ । सभालाई सम्बोधन गर्न नेकपा महासचिव विप्लव सहभागी हुने छैनन् । चुनाव बहिष्कार अभियानको नेतृत्वकर्ता भएकाले सुरक्षाको खतरा रहेको जनाउँदै पार्टीले उनको सट्टा पार्टी प्रवक्ता प्रकाण्डलाई वक्ता तोकिएको छ ।

गएको वैशाखमा सम्पन्न स्थानीयको तहको चुनावमा भाग लिएको नेकपाले योपटकको चुनावमा भने भाग नलिई बहिष्कारमा जाने निर्णय गरेको छ ।

दुवै पार्टीले सभा शुरु हुनुपहिले विभिन्न स्थानबाट जुलुस निकाल्नेछन् । राप्रपाको आमसभा भने भोलि शुक्रबार बसुन्धाराचोकमा हुँदैछ । आमसभालाई अध्यक्ष लिङदेनले सम्बोधन गर्ने कार्यक्रम रहेको पार्टी कार्यालयले जनाएको छ ।