मोरङ २ का उम्मेदवारः मतदातालाई सिकाउँदै, प्रतिबद्धता जनाउँदै

२४ कात्तिक, विराटनगर । आसन्न प्रतिनिधिसभा तथा प्रदेशसभाको निर्वाचनमा मतदाताले मतपत्रमा स्वस्तिक चिह्न भएको छाप नै लगाउनुपर्ने जानकारी मतदातालाई दिनुपर्ने भएको छ । विगतमा मतदान केन्द्रमा स्वस्तिक चिह्न बेगरको छाप मतपत्रमा देखिएकाले अहिले यससम्बन्धी जानकारी मतदातालाई दिनुपर्ने अवस्था रहेको प्रदेश निर्वाचन कार्यालय विराटनगरले जनाएको छ ।

एक मतदाताले प्रतिनिधिसभा सदस्य र प्रतिनिधिसभा समानुपातिक तथा प्रदेशसभा सदस्य र प्रदेश समानुपातिक गरी चार छाप लगाउनुपर्ने शिक्षा राजनीतक दल, दलका प्रतिनिधि तथा उम्मेदवारहरुले मतदातालाई दिनुपर्र्ने निर्वाचन अधिकारी लेवन कास्यप अधिकारीले जानकारी दिए ।

मोरङ निर्वाचन क्षेत्र नं २ का उम्मेदवार यही सन्देशसहित मत माग्ने कार्यमा व्यस्त देखिन्छन् । मोरङ निर्वाचन क्षेत्र नं २ शतप्रतिशत किसान भएको क्षेत्र हो । परम्परागत कृषि प्रणालीले किसानको जीवनस्तरमा परिवर्तन नआएपछि कृषिमा आधुनिकीरण गर्नुपर्ने, बीउबिजन, सिँचाइ, बजारको व्यवस्थापनको राम्रो प्रबन्ध हुनुपर्ने किसानको माग छ ।

यहाँ सीपमूलक एवं प्राविधिक शिक्षा, प्रसूतिगृह, आधारभूत आवश्यकतासहित स्वास्थ्य केन्द्र, युवा र महिलालाई स्वरोजगारमा उत्साहित बनाउन सीप, पुँजी र प्रविधि दिनुपर्ने माग यो क्षेत्रका जनताले गरेका छन् । रतुवामाई, बक्राहा, डाँस खोला, चिस्याङ र लोहन्द्रा खोला प्रभावित यो क्षेत्र पूर्वपश्चिम भए पनि नदीमा पुल नभएकाले जनता पूर्वपश्चिम ओहोरदोहोर गर्न सकेका छैनन् । जनतालाई सुविधा प्रदान गर्न यी नदीहरुको नियन्त्रण एवं व्यवस्थापन तथा पुल बनाउनुपर्ने चाहना जनताले राखेका छन् ।

यी खोलालाई नियन्त्रण एवं व्यवस्थापनमा राज्य कोषबाट अरबौ रकम खर्च भइसकेको छ तर पनि वर्षात्का समयमा नदीमा आउने बाढी र कटानबाट जनता ढुक्क हुन सकेका छैनन् । रंगेली नगरपालिका प्रमुख दिलीप बगडियाले आफू नगर प्रमुखमा निर्वाचित भइसकेपछि यहाँका सडकको स्तरोन्नति गर्न दिनरात मेहनत गरेको बताए । यस क्षेत्रमा सुकुम्बासी समस्या अत्यधिक रहेकाले त्यसको समाधानमा पनि आफू लागेको उनको भनाइ छ ।

यस क्षेत्रमा नागरिकता समस्या पनि गम्भीर छ । परापूर्वकालदेखि बस्दै आएका सन्थाल, बाँतर, कृषि समुदाय नेपाली नागरिक भएर पनि नागरिकताबाट बञ्चित भएका छन् । यस्तै नागरिकको पहिचान गरी स्थानीय पालिकाबाटै सिफारिस गराएर नागरिकता दिनुपर्ने खाँचो रहेको उनले बताए ।

वाम लोकतान्त्रिक गठबन्धन तथा नेपाली कांग्रेसका प्रतिनिधिसभाका उम्मेदवार सुजाता कोइरालाले महिला सशक्तीकरणका लागि महिला लघुउद्यम सञ्चालनमा ल्याउने, पूर्वाधारको विकास गरी यहाँ बक्राहा, लोहन्द्रा, चिस्याङ र दन्स खोलाको नियन्त्रण एवं व्यवस्थापनमा ध्यान दिने, क्षेत्रमा नमुना विद्यालय, स्वास्थ्य सेवा, रोजगारीका समस्या समाधान गर्नेजस्ता प्रतिबद्धतासहित मत माग्ने गरेकी छन् ।

यही क्षेत्रका प्रतिनिधिसभाका उम्मेदवार नेकपा एमाले ऋषिकेश पोखरेलले यो क्षेत्र हरेक हिसाबले पछि परेको भन्दै नेता र मन्त्री एवं प्रधानमन्त्री उत्पादन गर्ने यो क्षेत्रको विकासमा राज्यको ध्यान नगएकामा चिन्ता व्यक्त गरे । उनले यस क्षेत्रका नागरिकको समस्या र दुःख आफूले बुझेकाले आफू निर्वाचित भएमा नीतिगत तथा व्यावहारिकरुपमा राज्यलाई दवाव दिएर जनताका समस्या समाधान गराउने प्रयत्न गर्ने बताए ।

राष्ट्रिय प्रजातन्त्र पार्टीका प्रतिनिधिसभाका उम्मेदवार गोपाल दाहालले यस क्षेत्रमा अहिले पनि मलको हाहाकार रहेकाले चुनावी प्रचारप्रसारका क्रममा किसानबाट व्यापक गुनासो आएको बताए । रंगेली नगरपालिका वडा नं ८ स्थित सखुवाथान चोकमा साझा संस्थामा ५० बोरा मल छ, संस्थाले छ सय कुपन बाँडेको छ । एक हजार पाँच सय जना किसान मल लिन भीड लागेका छन्, मल नपाएर उम्मेदवारले किसानबाट लखेटिने अवस्था सिर्जना भएको उनले बताए ।

कूल मतदाता एक लाख २४ हजार सात सय २९ र ६८ मतदानस्थल तथा एक सय ५१ मतदान केन्द्र रहेको यस क्षेत्रमा केराबारी गाउँपालिकाका सबै वडा, मिक्लाजुङ गाउँपालिकाका वडा नं १, ४ र ५ तथा लेटाङ नगरपालिकाका सबै वडा पर्दछन् । अघिल्लो प्रतिनिधिसभाको निर्वाचनमा नेपाली कांग्रेसका नेता डा मीनेन्द्र रिजाल निर्वाचित यो क्षेत्रमा अहिले नेपाल मजदुर किसान पार्टीका सुरेश कवाँसहितका उम्मेदवार यस क्षेत्रमा रहेका छन् ।