सिन्धुलीमा एमालेको २५ बर्षे बर्चश्व तोड्ने कांग्रेसको दाउ

२६ कात्तिक, काठमाडौं । मंसिर ४ को मिति जति नजिक आउदैछ चुनावी सरगर्मीपनि तिब्र गतिमा बढेको छ । मंसिर ४ गते हुने प्रतिनिधिसभा र प्रदेशसभाको निर्वाचनमा देशभर सरगर्मी बढेको बेला सिन्धुली क्षेत्र नम्बर १ मा पनि यसको प्रभाव देखिन थालेको छ । विगतभन्दा यसपटक क्षेत्र १ तर्फ प्रतिनिधिसभामा रोचक प्रतिस्पर्धा हुने भएको छ ।

२०७४ सालको प्रतिनिधिसभा र प्रदेशसभाको निर्वाचनमा सोही प्रदेशको ख मा प्रतिस्पर्धा गरेको नेपाली कांग्रेसका श्यामकुमार घिमिरे र नेकपा एमालेबाट प्रतिस्पर्धा गरेका प्रदिप कटुवालबीच प्रतिनिधिसभामा प्रतिस्पर्धा हुने भएपछि निर्वाचन रोचक मोडमा पुगेको हो । गठबन्धनबाट उम्मेदवार बनेका नेपाली कांग्रेसका केन्द्रिय सदस्य श्यामकुमार घिमिरे नेकपा एमालेको २५ वर्षे विरासतलाई यसपटक तोडेर आफू सांसद बन्ने दौडमा छन् । गत ०७४ को निर्वाचनमा हालका प्रतिनिधिसभाका उम्मेदवार काँग्रेसका घिमिरेलाई हराउदै प्रदेशसभा सदस्य बनेका प्रदिप कटुवाल पुन घिमिरेलाई हराएर जित्ने दाउमा छन् ।

दुबै उम्मेदवार मतदातामाझ आश्वासन बाड्न व्यस्त छन् । गठबन्धन तर्फबाट उम्मेदवार बनेका घिमिरे र नेकपा एमालेले २५ वर्ष गर्न नसकेका काम आफू पाँच वर्षमै गर्ने मतदातामाझ बताइरहेका छन् । ‘म नेकपा एमालेको लामो समयदेखिको विराशत भत्काउछु, उनले भने, एमालले यस क्षेत्रमा २५ वर्षदेखि गर्न नसकेका काम म निर्वाचित भएपछि पाँच वर्षमै गरेर देखाउछु ।’

गठबन्धन भित्र अन्तरघात नभए यस क्षेत्रमा यसपटक एमालले २५ वर्षदेखि कायम गरेको विराशत भत्कन सक्ने बताइएको छ । यस्तै नेकपा एमालेका उम्मेदवार कटुवालले सरकारले मंहगी बढाउने र भ्रष्टचारलाई बढाउन सहयोग गर्ने काम गरेको आरोप लगाउदै यो सरकारबाट जनचाहना अनुसारको विकास निर्माण नहुने भएकाले आफूलाई मत दिन मतदातामाझ आग्रह गरेर गाउँ शहरमा मत मागिरहेका छन् । उनले मतदातालाई आफू निर्वाचित भए विकास हुने आश्वासन दिइ रहेका छन । ‘मैले प्रदेशसभा सदस्य भएर थालनी गरेको धेरै अधुरा काम छन्, ति कामलाई पुरा गर्न म उम्मेदवार भएको हुँ’,उनले भने । यस क्षेत्रमा दुई प्रदेशसभा क्षेत्र छन् । गठबन्धनका तर्फबाट सिन्धुली क्षेत्र नं. १ का प्रदेश क मा माओवादीका मातृका भट्टराई चुनावी मैदानमा छन् भने एमालेबाट सुवास देवकोटा चुनावी मैदानमा होमिएका छन् । यस्तै प्रदेश ख मा गठबन्धनका तर्फबाट नेपाली कांग्रेसका रामुकमार पहाडीको र एमालेबाट कुमारबहादुर कार्कीको प्रतिस्पर्धा हुने भएको छ ।

निर्वाचनको मिति नजिकिदै जाँदा उम्मेदवारलाई घरदैलो कार्यक्रम गर्न भ्याइनभ्याई भएपनि मतदातामा भने खासै रौनक देखिएको छैन । मतदाता खेतबारीकै काममा व्यस्त भएकाले रौनक नदेखिएको स्थानीय बताउँछन्। उम्मेदवारले निर्वाचनका बेला घरदैलोमा आएर दिएका आश्वासन मतदाताले पत्याउदैनन् । दुई प्रतिनिधिसभा निर्वाचन क्षेत्र र चार प्रदेशसभा निर्वाचन क्षेत्र रहेको सिन्धुलीमा २ लाख ८ हजार ३ सय ६९ जना मतदाता रहेका छन् ।

१ सय ५१ मतदान स्थलमा २ सय ६७ स्थाई मतदान केन्द्र छन् । यस्तै दुई ओटा अस्थाई मतदान केन्द्र थप भएको जिल्ला निर्वाचन कार्यालय सिन्धुलीले जनाएको छ । दुवै निर्वाचन क्षेत्रमा यसअघि वामपन्थी उम्मेदवारले निर्वाचन जितेका थिए । एमालेका गणेश पहाडी र माओवादीका हरिबोल गजुरेलले यसपटक टिकट पाएका छैनन । पहाडीले टिकट नपाएपनि उनी मत माग्न हिडिरहेका छन् । तर गजुरेल भने माओवादीको उम्मेदवारसँग मत माग्न हिडेका छैनन ।