रोल्पाको चुनावी सभालाई सम्वोधन गर्न प्रधानमन्त्री देउवा र प्रचण्ड होलेरी जाने

२७ कात्तिक, काठमाडौं । आमनिर्वाचन नजिकिदै जादा दलका शिर्ष नेताहरुको चुनावी प्रचारप्रसार अभियान पनि तिवरुपमा चलिरहेको छ ।कात्तिक २९ गते लोकतान्त्रिक वाम गठवन्धन निर्वाचन परिचालन समिति रोल्पाको जिल्ला स्तरीय चुनावी सभालाई सम्वोधन गर्न प्रधानमन्त्री तथा नेपाली कांग्रेसका नेता शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्ड होलेरी जाने भएका छन् ।

सशस्त्र युद्ध घोषणा गरेको त्यही होलेरीबाट २७ वर्षपछि प्रधानमन्त्री देउवा र प्रचण्डले शान्ति र मेलमिलापको सन्देश दिने भएका छन । विगतमा द्वन्द्वको किल्ला रहेको रोल्पा अब शान्तिको किल्ला बन्दै गएको कुरालाई आश्वस्त पार्न देउवा र प्रचण्ड होलेरी जान लागेको बताइएको छ ।

दश वर्षे सशस्त्र द्वन्द्वकालमा तत्कालीन विद्रोही नेकपा माओवादीले होलेरी चौकी २ पटक आक्रमण गरेको थियो । होलेरी चौकी आक्रमण हुँदा देउवा गृहमन्त्री थिए भने दाहाल तत्कालीन विद्रोही माओवादीको महामन्त्री थिए । उक्त आक्रमण माओवादी नेता वर्षमान पुनको नेतृत्वमा भएको थियो ।

एक निर्वाचन क्षेत्र रहेको रोल्पाबाट प्रतिनिधि सभामा नेकपा माओवादी केन्द्रका वर्षमान पुन तथा प्रदेश सभा १ सोही पार्टीका जोखवहादुर महरा चुनावी प्रतिस्पर्धामा उत्रिएका छन । प्रदेश सभा २ मा भने नेपाली कांग्रेसका लुम्बिनी प्रदेश सभापति अमरसिंह पुन लोकतान्त्रिक वाम गठबन्धनको साझा उम्मेदवारको रुपमा प्रतिस्पर्धामा उत्रिएका छन ।

पुन दोस्रो पटक रोल्पाबाट प्रतिनिधिसभा सदस्य उम्मेदवार बन्दा आफ्नै पूर्व सहकर्मीलाई प्रतिस्पर्धीको रूपमा पाएका छन् । जित दोहो¥याउने उनको चाहनामा कुनै बाधा छ भने एमालेका उम्मेदवार बनेका माओवादीकै पूर्व लडाकू पूर्ण बुढा हुन् । माओवादी सशस्त्र युद्धको उद्गमथलो रोल्पामा यस पटक नेकपा एमालेबाट प्रतिनिधिसभा उम्मेदवार पनि पूर्व माओवादी नै छन् । नेकपा एमाले र माओवादी केन्द्रको एकीकरण खारेज भएपछि रामबहादुर थापा बादलसँगै एमालेमै रहेका नेता बुढा यसपटक एमालेबाट उम्मेदवार बनेका हुन् ।

सशस्त्र युद्धका क्रममा वर्षमान पुन मातहतमा धेरै फौजी आक्रमणमा सहभागी भएका बुढा यसपटक पुन विरुद्ध नै चुनावी मैदानमा उत्रिएकाले रोल्पाको प्रतिस्पर्धालाई रोचक मानिएको छ । प्रदेशसभा २ निवर्तमान प्रदेश सभा सदस्य तथा माओवादी नेता दीपेन्द्र पुनले स्वतन्त्र उम्मेदवारी दिएका छन् । माओवादीले उम्मेदवारी फिर्ता लिन भने पनि उनले मानेका छैनन् ।