मतपेटिका प्रहरी चौकीमा लगेर मतदान अधिकृत सुत्न गएपछि दैलेखमा विवाद, सर्वदलीय बैठक बस्दै

५ मंसिर, दैलेख । मतदान सकिएपछि दैलेखको ठाँटीकाँध गाउँपालिकामा मतदान अधिकृतले मतपेटिका प्रहरी चौकीमा लगेर आफू सुत्न गएपछि विवाद भएको छ ।

ठाँटीकाँध गाउँपालिका – २ पिपलचौतारास्थित जनता आधारभूत विद्यालय केन्द्रका मतदान अधिकृत ज्वालाप्रसाद खनालले प्रहरी चौकीमा मतपेटिका छाडेर आफू सुत्न गएपछि विवाद भएको हो । अहिले मतपत्र गाउँपालिका मै छ । दुल्लु नगर पालिकामा ल्याउनु पर्ने मत पेटिका मतदान अधिकृत लापरबाहीका कारण गाउँ मै छाडिएको हो ।

दैलेख क्षेत्र नम्बर दुईका मुख्य निर्वाचन अधिकृत सरोजनिधि वाग्लेले घटनाको छानबिन भइरहेको बताएका छन् । अहिले सर्वदलीय बैठक बसिरहेको र त्यसबारे निर्णयमा पुगिने जनाइएको छ । उक्त मतदान केन्द्रमा ७ सय मतदाता रहेकोमा ४ सय ५८ मत खसेको थियो । सबै मत पेटिका गणनाका लागि दुल्लु पुगिसकेका छन् ।