बागलुङबाट प्रतिनिधिसभा सदस्यमा चित्रबहादुर केसी विजयी

७ मंसिर, पोखरा ।  मंसिर ४ मा भएको प्रदेश र प्रतिनिधिसभा निर्वाचन अन्तर्गत प्रतिनिधिसभा सदस्यमा राष्ट्रिय जनमोर्चाले बागलुङबाट पहिलो जित निकालेको छ । जनमोर्चाका अध्यक्ष चित्रबहादुर केसी बागलुङको प्रतिनिधिसभा क्षेत्र नम्बर २ बाट निर्वाचित भएका छन् ।

प्रदेश तथा प्रतिनिधिसभा निर्वाचन २०७९ को अन्तिम मतपरिणाम अनुसार सत्ता गठबन्धनको समर्थनमा जनमोर्चाका अध्यक्ष केसीले नेकपा एमालेका उमेदवार सूर्यप्रसाद पाठकलाई हराएका हुन् ।

केसीले २१ हजार ४५१ मत ल्याउँदा एमालेका पाठकले १८ हजार ८२५ मत ल्याए । यो क्षेत्रमा राष्ट्रिय स्वतन्त्र पार्टीका खिमानन्द कँडेलले नौ हजार १८१ मत प्राप्त गरे । राष्ट्रिय प्रजातन्त्र पार्टीका लक्ष्मीप्रसाद सापकोटाले ९०३ मत ल्याए ।

अन्य दुई स्वतन्त्र उमेदवार शिवलाल सापकोटाले १२५ र चन्द्रबहादुर क्षेत्रीले १९३ मत पाए । एक लाख एक हजार २२३ मतदाता रहेको यो क्षेत्रमा ५४ हजार ७११ मत खस्दा ५२ हजार ८७० मत सदर भएको थियो ।