सिन्धुपाल्चोक-२ बाट शेरबहादुरको संसदीय यात्रामा पूर्णविराम

९ मंसिर, सिन्धुपाल्चोक । मंसिर ४ मा सम्पन्न भएको प्रदेश र प्रतिनिधिसभाको निर्वाचन अन्तर्गत सिन्धुपाल्चोक क्षेत्र नम्बर २ बाट लगातार जित्दै आएका नेकपा एमालेका नेता शेरबहादुर तामाङको संसदीय यात्रामा पूर्णविराम लागेको छ । दुई प्रतिनिधिसभा र चार प्रदेशसभा निर्वाचन क्षेत्र रहेको सिन्धुपाल्चोकमा गठबन्धनले जित हासिल गरेको छ ।

क्षेत्र नम्बर २ बाट लोकतान्त्रिक वाम गठबन्धनका साझा उम्मेदवार कांग्रेसका मोहनबहादुर बस्नेत विजयी भएका छन् । ११ हजार ८ सय ७४ भारी मतान्तरका साथ शेरबहादुर तामाङलाई हराउदै बस्नेतले जित निकालेका हुन् । सिन्धुपाल्चोक निर्वाचन क्षेत्रमा नेपाली कांग्रेसका लागि यो पहिलो जित समेत हो ।

बस्नेतले ३९ हजार ३ सय ६७ मत ल्याउदा तामाङले २७ हजार ४ सय ९३ मत ल्याएका छन् । क्षेत्र नम्बर १ बाट प्रतिनिधिसभा सदस्यमा एमालेलाई हराउदै लोकतान्त्रिक वाम गठबन्धनका साझा उम्मेदवार माओवादी केन्द्रका माधब सापकोटा विजयी भएका छन् ।

यसैगरी, क्षेत्र नम्बर २ प्रदेशसभा ‘क’ मा बागमती प्रदेशका पूर्वसामाजिक विकासमन्त्री युवराज दुलाल र ख मा कृष्णकुमार तामाङ विजय भएका छन् । १ क मा कांग्रेसका मसिना खड्का भण्डारी र ख मा माओवादी केन्द्रका सरल सहयात्री पौडेल विजयी भएका छन् ।