नवनिर्वाचित सांसद रबि लामिछानेविरुद्ध उजुरी

९ मंसिर, काठमाडौं । चितवन क्षेत्र नं. २ बाट प्रतिनिधिसभा सदस्यमा (सांसद) राष्ट्रिय स्वतन्त्र पार्टीका सभापति रवि लामिछानेविरुद्ध गृह मन्त्रालयमा उजुरी परेको छ । समाजवादी केन्द्र नेपालको सर्वोच्च नेता बताउने युवराज सफलले  सांसद लामिछानेविरुद्ध उजुरी दिएका हुन् ।

लामिछानेले नेपाली नागरिकता पुनर्प्राप्तिको कानुनी प्रकृयासमेत पुरा नगरी निर्वाचन आयोगमा दल दर्ता गरेको र चुनावमा भाग लिई प्रतिनिधिसभाको उम्मेदवार समेत निर्वाचित भएको व्यहोराको उजुरी मंसिर ९ मा मन्त्रालयको गुनासो व्यवस्थापन शाखामाख दर्ता भएको जनाइएको छ ।

निर्वाचन आयोगले मतगणना सम्पन्न भइसकेको जनाउँदै उजुरी लिन नमिल्ने बताएपछि महाशाखामा उजुरी दिइएको हो ।

लामिछाने विरुद्ध निर्वाचन आयोगमा पनि उजुरी परेकाे थियाे । लामिछानेले अमेरिकाबाट फर्किएपछि रद्द भइसकेको नेपाली नागरिकता प्रयोग गरी उम्मेदवारी दर्ता गरेको भन्दै उम्मेद्ववारी खारेजीकाे मागसहित उजुरी परेको थियो । तर आयाेगले आफ्नाे क्षेत्राधिकारभित्र नपर्ने भन्दै उजुरीमाथि कारबाही गर्न मानेन ।

लामिछाने अमेरिकाको नागरिकता ‘त्याग’ गरेर नेपाल फिर्ता भएका हुन् । यसअघि पनि उनको नागरिकताबारे प्रश्न नउठेको होइन ।