पाल्पाको दुइटै निर्वाचन क्षेत्रमा एमालेका उम्मेदवार विजयी, १ बाट आचार्य र २ मा गैरे

९ मंसिर, काठमाडौं । पाल्पाको प्रतिनिधिसभातर्फ दुई वटै निर्वाचन क्षेत्रमा नेकपा (एमाले)का उम्मेदवार विजयी भएका छन् । क्षेत्र नं. १ बाट एमालेका नारायणप्रसाद आचार्य र २ बाट ठाकुरप्रसाद गैरे विजयी भएका हुन् ।

क्षेत्र नं. १ मा आचार्य ३१ हजार १०३ मत ल्याएर विजयी भए भने उनका निकटतम प्रतिद्वन्द्वी नेपाली कांग्रेसका ज्ञानबहादुर गाहाले २० हजार दुई सय ५६ मत ल्याएको सहायक निर्वाचन अधिकृत रामहरि पाण्डेयले जानकारी दिए ।

यस्तै, यहाँ स्वतन्त्र उम्मेदवार विपिन कँडेलले दुई हजार आठ सय ६३, जनता समाजवादी पार्टी नेपालका मेहरमान रानाले ८५, राष्ट्रिय प्रजातन्त्र पार्टीका ज्ञानबहादुर सिंजालीले दुई सय ५२, मङ्गोल नेशनल अर्गनाइजेशनका थमनबहादुर बुढामगरले एक हजार नौ सय १६ र राष्ट्रिय जनमुक्ति पार्टीका उजरसिं दर्लामीले एक सय १५ प्राप्त गर्नुभयो । आयोगका अनुसार स्वतन्त्र उम्मेदवारहरु नारायण न्यौपानेले २७, राजु सुनारले ६८ र डोलराज तिमिल्सिना (पुतली चिह्न) ले १० मत प्राप्त गरे ।

प्रतिनिधिसभा क्षेत्र नं १ मा ९६ हजार ३३ मतदाता रहेकोमा निर्वाचनमा ५८ हजार चार सय ९१ मत खसेको थियो । जसमध्ये एक हजार चार सय सात मत बदर भएको छ । प्रतिनिधिसभामा निर्वाचित आचार्य २०७४ को क्षेत्र नं १ (ख)बाट प्रदेशसभा सदस्यमा निर्वाचित भएका थिए ।

यस्तै पाल्पाको निर्वाचन क्षेत्र नं. २ बाट एमालेकै ठाकुर गैरे विजयी भएका छन् । उनले माधवकुमार नेपाल नेतृत्वको नेकपा (एकीकृत समाजवादी)का नेता सोमप्रसाद पाण्डेलाई हराएका छन् ।

गैरेले २७ हजार ८१७ मत प्राप्त गरेर विजयी हुँदा पाण्डेले २३ हजार ८५१ मत पाएका छन् । यो निर्वाचन क्षेत्रमा सधैं पाण्डेले चुनाव जित्दै आएका थिए ।