नौ वटा क्षेत्रको परिणाम आउन बाँकी, तीन जिल्लामा अझै विवाद

११ मंसिर, काठमाडौं । मंसिर ४ गते सम्मन्न भएको प्रदेश र प्रतिनिधिसभा सदस्य निर्वाचनको मतपरिणाम आउने क्रम अन्तिम चरणमा रहेको छ । अब देशभरका नौवटा निर्वाचन क्षेत्रको मत परिणाम आउन बाँकी छ । देशभरका १६५ निर्वाचन क्षेत्रमध्ये बिहान पौने १० बजेसम्म १५७ क्षेत्रको परिणाम सार्वजनिक भइसकेको छ ।

जसमा कांग्रेस ५३ सिटसहित पहिलो स्थानमा छ । दोस्रो स्थानमा रहेको एमालेले ४१ सिट जितेको छ । तेस्रो स्थानमा रहेको नेकपा (माओवादी केन्द्र)ले १७ सिट जितेको छ । नेकपा एकीकृत समाजवादीले १० सिट जितेको छ । राष्ट्रिय स्वतन्त्र पार्टी र राष्ट्रिय प्रजातन्त्र पार्टी समान सात–सात सिट जितेका छन् ।

जनता समाजवादी पार्टीले ६ सिट जितेको छ । लोकतान्त्रिक समाजवादीले चार सिट जित्दा नागरिक उन्मुक्ति पार्टीले तीन सिट जितेको छ । नेपाल मजदुर किसान पार्टी, जनमत पार्टी र राष्ट्रिय जनमोर्चाले एक–एक सिट जितेका छन् । पाँच क्षेत्रमा स्वतन्त्र उमेदवार विजयी भएका छन् । बाँकी रहेका ९ क्षेत्रमध्ये नेपाली कांग्रेस तीन क्षेत्रमा अगाडि छ । दुई क्षेत्रमा एमाले र एक क्षेत्रमा राष्ट्रिय स्वतन्त्र पार्टी अगाडि छ ।

सुनसरी–४ मा सञ्चार तथा सूचना प्रविधिमन्त्रीसमेत रहेका कांग्रेसका ज्ञानेन्द्रबहादुर कार्की अगाडि छन् । उनले २३ हजार ४३९ मत ल्याएका छन् । उनलाई पछ्याइरहेका एमालेका जगदिशप्रसाद कुसियैत २३ हजार ३४१ मत पाएका छन् । उदयपुर–१ मा कांग्रेसका नारायण खड्का अगाडि छन् । पछिल्लो विवरणअनुसार खड्काले २७ हजार ४८४ मत पाएका छन् । एमालेकी मञ्जुकुमारी चौधरी २५ हजार ६५९ मतका साथ दोस्रो स्थानमा छिन् ।

धनुषा–४ मा कांग्रेसका महेन्द्र यादव २२ हजार ४५७ मतसहित अगाडि छन् । एमालेका रघुवीर महासेले २१ हजार ३७१ मत पाएका छन् । सुनसरी–३ मा एमालेकी भगवती चौधरी २२ हजार ८४२ मतका साथ अग्रस्थानमा छिन् । नेपाली कांग्रेसका विजयकुमार गच्छदारले १८ हजार २६७ मतका साथ पछ्याइरहेका छन् ।

इलाम–१ मा एमालेका महेश बस्नेत २० हजार ३८५ मतका साथ अग्रस्थानमा छन् । उनलाई पछ्याइरहेका नेकपा (एकीकृत समाजवादी)का झलनाथ खनाल १८ हजार २०५ मत पाएका छन् । सुनसरी–१ मा राष्ट्रिय स्वतन्त्र पार्टीका गोमा तामाङ १२ हजार ८५५ मतसहित अगाडि छन् । जनता समाजवादी पार्टी जसपाका अशोक राईले १२ हजार ५०४ मत पाएका छन् ।

दोलखा–१, स्याङ्जा–२ र बाजुरामा अझै मतगणना सुरु भएको छैन । विवादका कारण निर्वाचन र मतगणनामा भएको ढिलाइ तथा मतगणना स्थागितका कारण समयमै नतिजा आउन सकेको छैन । बाजुरा, दोलखा र स्याङ्जाबाहेक अरु सबै जिल्लाको प्रत्यक्ष तथा समानुपातिकतर्फको मतपरिणाम आज साँझ अथवा भोलिसम्म आइसक्ने आयोगको भनाइ छ ।