मुचुल्का र मतगणना फारममा फरक परेकाे भन्दै समानुपातिक मत पुनः गणना गर्न एमालेको माग

१२ मंसिर, बुटवल । रुपन्देहीको प्रतिनिधि सभा निर्वाचन क्षेत्र नं. १ मा समानुपातिक तर्फको मतगणनामा धाँधली भएको आरोप एमालेले लगाएको छ । यहाँ पुनः गणना गर्न नेकपा (एमाले)ले माग गरेको छ ।

सोमबार बुटवलमा पत्रकार सम्मेलन गर्दै एमालेका सचिव एवं सो क्षेत्रबाट निर्वाचित सांसद छविलाल विश्वकर्माले मतगणनामा धाँधली भएको प्रमाण भेटिएको उल्लेख गर्दै पुनः गणना हुनुपर्ने माग गरे ।

नेकपा एमाले रुपन्देही सचिव यज्ञमुर्ति गैरेले ९ वटा मतपेटिका जाँच गरेको मुचुल्कामा मतदाता संख्या जम्मा ५७४६ उल्लेख भएको तर मतगणना फारममा ५७३ मत संख्या थपी ६,३१९ उल्लेख गरेको देखिएको पत्रकार सम्मेलनमा बताए ।

उनले ‘ओमसतिया गाउँपालिका वडा नं. ६ (ख), केरवानी ९क०, तिलोत्तमा वडा नं. ९ गौतमबुद्ध शिशु सदन आवि, (क) देवदह वडा नं. ६, युगज्योति (ख), तिलोत्तमा वडा नं. ८ ज्योति मावि (घ), ओमसतिया वडा नं. १ ठुटीपिपल मावि (ख), देवदह वडा नं. ३ केरवानी मावि (ख), देवदह वडा नं. १० सिता मावि (क), देवदह वडा नं. १२ सिक्टहन (ख) समेतका ९ वटा मतपेटिकाको गणनामा धाँधली भएको बताए ।