उदयपुर १ मा मतगणना सुरू गर्न निर्वाचन आयोगको निर्देशन

१२ मंसिर, काठमाडौं । निर्वाचन आयोगले उदयपुर क्षेत्र नं. १ मा स्थगित भएको मतगणना सुचारु गर्न निर्देशन दिएको छ । सोमबार आयोगका उपसचिव ऋषिराम भुसालले उदयपुरका मुख्य निर्वाचन अधिकृतलाई पत्र लेख्दै यसअघि मतगणनामा भएको सहमति अनुसार मतगणनालाई निरन्तरता दिन निर्देशन दिएका हुन् ।

‘सो सम्बन्धनमा मतगणना पूर्व जे जस्तो सहमति भएको हो सो सहमतिका आधारमा मतगणना कार्यलाई निरन्तरता दिन सम्बन्धित मुख्य निर्वाचन अधिकृतलाई निर्देशन दिने’, उप–सचिव भुसाल जारी गरेको निर्देशन पत्रमा भनिएको छ ।

आयोगले दोहोरो मतदान भएकोमा मंसिर ४ गते को आयोगको पत्र बमोजिम मतगणनालाई निरन्तरता दिनसमेत भनेको छ । पराष्ट्रमन्त्री डा. नारायण खडका उम्मेदवार रहेका उक्त क्षेत्रमा प्रतिनिधिसभाको मतगणनाका क्रममा प्रदेशसभाको मतपत्र भेटिएपछि विवाद हुँदा आइतबारबाट गणना रोकिएको छ।

मन्त्री खडकासँग नेकपा (एमाले)की मञ्जुकुमारी चौधरी प्रतिस्पर्धामा छिन् । चौधरी खडकाभन्दा एक हजार ७ सय १३ मतले पछाडि छिन् ।